2 nasikop sa drug bust; armas sakmit
Duha ka giila sa kapulisan nga high value individual (HVI), usa nakuhaan og armas, atol sa managlahing mga operasyon sa kapulisan.
Ang Mandaue City Drugs Enforcement Unit ug Intelligence Police nga gipangulohan sa ilang hepe nga si Police Lt. Col. Wilfredo Alarcon nilusad og buy-bust sa Ouano Ave., North Reclamation Area, Brgy. Subangdaku, alas 3:06 sa kaadlawon sa Miyerkules, Pebrero 28, 2024.
Ang nasikop nga suspek giilang si Mechiel Codizar Bordadora, 36, dalaga, taga Zone 6, Brgy. Canduman, Mandaue City.
Nasakmitan siya og giduhang shabu nga gibana-bana nga 60 gramos nga may standard drug price nga P408,000.
Samtang, ang mga sakop sa Municipal Drugs Enforcement Unit Intelligence Police sa lungsod sa Dalaguete ubos sa pag pangulo ni Police Maj. Clemente Ceralde Jr. nakadakop sa usa ka giilang HVI.
Kini nasakmitan og 10 gramos sa gituhoang shabu nga may SDP nga P68,000 ug .45 kalibre nga armas nga may usa ka magazine ug siyam ka mga bala.
Lakip sa nasakmit mao ang usa ka multicab nga may karga nga usa ka motorsiklo.
Ang malampuson nga buybust gihimo alas 2:30 sa kaadlawon sa Martes, Pebrero 27, 2024, sa Sityo Solong-on, Brgy. Tapon, Dalaguete.
Ang suspek giila nga si Warren Cabungcag Limbaga, alyas Warren, 25, ulitawo apan may kapuyo, taga Sityo Upper Caliongan, Brgy. Caliongan, Dalaguete.
Gawas sa pagkalambigit sa ilegal nga drugas, suspek giingong dunay kasong pagpamusil sa bukirang dapit sa lungsod.
Ang mga suspek gikatakdang pasakaan og tukmang kaso sa pagkalambit sa negosyo sa ilegal nga drugas.