Doktor namatay human mikaon

Usa ka doktor gikan sa New York University namatay pagkahuman siya nikaon sa usa ka restawran sa Disney Springs sa Florida - ug gibasol sa bana ang nagpabaya nga mga kawani, sumala sa usa ka kaso.

Si Kanokporn Tangsuan, usa ka doktor sa prestihiyusong NYU Langone hospital sa Manhattan, kalit nga namatay human manihapon sa Raglan Road Irish Pub and Restaurant niadtong Oktubre 5.

Ang iyang bana, si Jeffrey Piccolo, nisang-at og 19-ka pahina nga kaso sa Orange County, Fla., Circuit court, nga nag-akusar sa Walt Disney Parks and Resorts sa pagpasagad, kay unta giklaro ni Tangsuan ngadto sa waitstaff nga siya adunay mga nut ug dairy allergy.

Ang mga kawani sa kananan niinsister nga makahimo sila og pagkaon nga walay allergen, human gisusi ni Tangsuan sa makadaghang mga higayon, matod sa kaso.

Ni-order si Tangsuan og broccoli ug corn fritter, scallops ug onion rings.

Ang restawran gipanag-iya ug gipadagan sa mga managkauban nga Irish nga sila John Cooke ug Paul Nolan, dili sa Disney.

Pagkahuman sa panihapon, mibiya si Tangsuan sa restawran aron pagsuhid sa shopping complex sa dihang nagsugod ang iyang pagkasakit.

Nisulod siya sa Planet Hollywood, diin nakasinati siya og grabeng kalisud sa pagginhawa ug natumba.

Bisan kon dali siyang gidapatan og epi-pen, namatay gihapon siya sa lokal nga ospital.

Ang bana ni Tangsuan nga si Jeffrey Piccolo, nipasaka batok sa Disney og usa ka kiha, nga naghisgot sa pagpabaya ug nangayo og danyos nga sobra sa $50,000.

Sumala sa mga papeles sa korte, ang imbestigasyon sa medical examiner nagpadayag nga siya namatay tungod sa anaphylaxis tungod sa “taas nga lebel sa dairy ug nut sa iyang sistema.”/