Nakalayat sa wa pa nitugpa ang awto

Usa ka turista sa Canada swerte nga buhi human siya nasayop sa pagliko sa usa ka hilit nga dalan sa Hawaii ug gimaneho ang iyang giabangan nga awto padulong sa 60 ka tiil nga pangpang, sa wala pa siya nahulog gikan sa awto ug nahulog sa dagat, matod sa mga otoridad.

Ang 27-anyos nga lalaki, kinsang ngalan wala gibutyag, giluwas sa mga bombero ug sa usa ka tripulante sa helicopter sa US Coast Guard human daghang mga mangingisda ang nakakita sa pagkahagsa ug nitawag sa 911, matod sa mga opisyal.

Ang insidente nahitabo mga alas 3:30 sa buntag niadtong Dominggo sa South Point area sa isla sa Hawai’i duol sa Ka’u Forest Reserve, sumala sa Hawaii Fire Department.

Matod sa mga saksi nga ang giabangan nga jeep sa maong tawo nahagsa sa kabatuan ubos sa pangpang.

Sa dihang ang drayber, nga nag-inusara, miabli sa pultahan sa passenger side, siya nahulog sa tubig ug gianod ngadto sa dagat, ang mga opisyal miingon.

Sa pag-abot sa mga bombero, ilang nakit-an ang tawo mga 100 ka metros gikan sa baybayon.

Ang mga bombero nakagiya kaniya sa paglangoy sa luwas nga lugar aron makahaw-as sa tubig, sumala sa departamento sa kabomberuhan.

Usa ka tripulante sa helicopter sa Coast Guard migamit og mga pisi aron makuha ang tawo.Gidala siya sa usa ka ospital, diin siya gitambalan tungod sa menor nga mga samad ug mild nga hypothermia, dugang sa mga opisyal.

Si Mike Moody, usa ka mananagat nga mamana nga didto sa maong dapit niadtong tungora, nitug-an sa estasyon nga kauban sa ABC News, KTIV, nga swerte ang turista nga naa siya ug ubang mga mangingisda niadtong higayuna ug nangayo og tabang.

Si Moody niingon nga ang nahagsa nga sakyanan nasangit sa mga bato dihang nabalitok ug nasangit sa pangpang.

Matod niya nga wa na makagawas ang motorista sa pultahan sa kilid sa drayber ug sa pag-abli niya sa pultahan sa passenger’s side, natagak gilayon siya sa tubig.

Ang mga otoridad niingon nga ang turista klaro nga nasayop sa pagliko ug nisangko sa gamay nga dirt road paingon sa pangpang.