Pag-counterflow sa highway

Pwera lang sa mga maayo, apan daghang drayber sa motorsiklo nga abusado. Nakaagi ka ba sa national highway sa dakbayan sa Mandaue panahon sa rush hours sa buntag ug hapon?

Makita nimo ang daghang motorsiklo nga kusog mo-counterflow o molapas sa tunga sa linya. Tungod sa kahinay sa pag-irog sa mga sakyanan, mo-overtake.

Ang ubang drayber makakurat sa karisgo sa pag-counterflow sa mga motorsiklo. Dili malikayan nga makapamalikas ang ilang makasugat.

Ug usa ka drayber sa sports utility vehicle (SUV) ang nag-viral sa social media tungod sa pagsugat sa mga ning-counterflow nga motorsiklo.

Nagpapidpid kini sa tunga nga linya sa dan JP Rizal o North Road, Barangay Tabok, Mandaue niadtong Huwebes, Pebrero 29, 2024.

Hinuon, hinay ang pagpadagan sa SUV hinungdan nga ang ning-counterflow nga motorsiklo namalik sa ilang lane.

Hinuon, klaro nga way intensiyon nga banggaan sa SUV ang mga motorsiklo. Sakto ba ang SUV? Dili ba ang outer lane nga gisubay niini giilang fast lane?

Sa usa ka interview sa SunStar Cebu kang Hyl Retuya, assistant head sa Traffic Enforcement Agency of Mandaue (Team), nagkanayon kini nga walay ipahamtang nga kalapasan sa drayber sa SUV.

Gipasabot ni Retuya nga nagpahihumdom lang ang drayber sa SUV sa mga drayber sa motorsiklo nga motahod sa lagda sa trapiko, bisan nikonsiderar nga risgo usab kini.

Gipasabot niya nga ang counterflowing maoy hinungdan sa pipila ka mga aksidente. Kon masakpan, ang Team moisyo og citation ticket nga nagkantidad og P1,000.

Ang mga motorsiklo dali lang makalusotlusot ug makapangita og diskarte ang drayber nga makaagi sa trapik kaayo nga dan.

Dili usab maayong mopugos ug molapas sa lagda sa trapiko aron makauna. Ang tanan nagdali gyud panahon sa rush hours.

Kinahanglan nga ikonsiderar ang pag-abot sa destinasyon nga luwas o dili malangay sa problema nga motumaw sa dan.

Maayong bantayan gyud kini sa traffic enforcers.