2 ka drug den gironda; 9 nasignit

Siyam ka drug personalities nangadakpan sa duha ka managlahi nga anti-illegal drug operations sa Philippine Drug Enforcement Agency 7 inabagan sa kapulisan sa dakbayan sa Sugbo.

Kini niresulta sa malampuson nga pagguba sa duha ka mga drug den. Sa siyam nga nadakpan, upat niini mga recidivist kay kanhi mga drug user nga ning-surrender ug nipaubos sa Barangay Community Based

Drug Rehabilitation Program.

Unang gironda sa PDEA 7 ala 1:30 sa Biyernes sa hapon, Marso 1, 2024 ang usa ka drug den nga nahimutang sa Sitio Rainbow Village, Barangay Kinasang-an, Dakbayan sa Sugbo nga niresulta sa pagkasikop sa walo ka nga suspek.

Lakip sa nadakpan ang nagpadagan sa balay suyopanan nga giila nga si Yulino Navarro, 59, kanhi drug surrenderer ug nakakompleto sa(CBDRP).

Apil sa mga nasikop sulod sa drug den mao silang Nestor Serdan 72, job order employee sa usa ka barangay sa dakbayan, ug laing duha ka drug surrenderer nga mao silang Chuckie Villeno, 36, watershop helper ug Jazz Delos Reyes Quilario, 39, construction painter.

Samtang ang laing upat giila nga silang Lexter Abaquita, 32, tailor; Glen Padinas, 39, PUJ driver; Norman Larawan, 42, jeepney driver ug Felix Tantiado, 56.

Nakuha gikan kanila ang 11 ka putos sa gituohang shabu nga motimbang og 11 gramos nga dunay estimated average market value nga P74,800, lakip na ang buy bust money.

Pagka alas 4:06 sa hapon laing operation gilusad sa PDEA 7 ug kapulisan, diin usa ka drug surrenderer nga nibalik sa iyang naandan nga trabaho sa A. Borres St., Barangay Suba, dakbayan sa Sugbo.

Ang suspek giila nga si Joemari Tagalog, 30, nga una nang nitahan atol sa panahon ni kanhi Presidente Rodrigo Duterte.