Counterflowing ‘numero 1’ nga hinungdan sa mga aksidente
Ang counterflowing maoy numero unong hinungdan sa mga aksidente sa sakyanan sa Mandaue City.
Hinuon, wa mohatag og tukma nga gidaghanon sa mga aksidente nga naglambigit niini si Hyl Retuya, assistant department head sa Traffic Agency of Mandaue (Team).
Nipahimangno si Retuya sa publiko nga usbon ang ilang huna-huna sa paggamit sa mga motorsiklo isip daling solusyon aron makaabot sa bisan unsang destinasyon.
Matod ni Retuya nga ang pag-counterflow mahimo’ng mosangpot sa makamatay nga mga aksidente.
“Adunay mga higayon nga ang mga nagmotorsiklo mosulay sa paglusot sa ubang mga sakyanan pinaagi sa pag-overtake niini sa higpit nga mga lugar, nga mahimo’ng mosangpot sa mga aksidente, sama anang naa ka sa blind spot sa usa ka trak,” ingon ni Retuya.
Iyang giawhag ang mga nagmotorsiklo nga di magdali pinaagi sa pagdumala sa husto sa ilang mga oras sa paglakaw.
Niini, malikayan ang counterflowing kay di na man magdali padulong sa destinasyon.
Nipahimangno siya nga di nila pasagdan ang counterflowing sa Dakbayan sa Mandaue,
ilang dakpon ang mga drayber nga naghimo niini.
Giluwatan kini ni Retuya human ni-viral ang video sa usa ka sports utility vehicle (SUV) nga nisugat sa mga nagmotorsiklo nga ni-counterflow pipila ka mga adlaw ang nakalabay.
Ang video gi-upload ni Mark Suico Gigremosa, kinsa niingon nga iya kining gibuhat aron masayran sa publiko kini nga mga hitabo.
Matod niya nga naandan na kini nga gibuhat sa mga nagmotorsiklo, apan kuyaw kini alang kanila ingon man sa nagmaneho sa SUV nga nisugat sa mga nagmotorsiklo.
Apan si Retuya nitataw nga kalapasan sa balaod sa trapiko ang counterflowing.
Busa niadtong Biyernes, Marso 1, nilusad sila og operasyon batok sa counterflowing, diin duna silay nadakpan nga mga nagmotorsiklo nga ilang naisyuhan og citation tickets.