Mandaue City gihangyo sa DepEd mag-hire og 50 ka JO
Gihangyo sa Department of Education Schools Division Office (DepEd-SDO) sa dakbayan sa Mandaue ang Mandaue City Government nga mo-hire og di mominos 50 ka job order (JO) o contract of service (COS) personnel aron moabag sa mga administratibong katungdanan sa mga magtutudlo.
Kini nahisubay sa bag-o lang gipagawas nga DepEd Order 002, s. 2024, nga nagtumong sa paghaw-as sa mga buluhaton nga administratibo gikan sa mga magtutudlo sa publikong eskwelahan ug unahon ang kalidad nga edukasyon.
Atol sa local school board meeting niadtong Pebrero 27, 2024, si Edgar Espina, administrative officer sa DepEd-SDO Mandaue, nipresentar og hangyo gikan sa Division nga mag-assign og labing menos duha ngadto sa tulo ka administrative officers (AOs) matag tunghaan.
Kini nga mga AO mahimo’ng responsable alang sa kinatibuk-ang administratibo nga suporta, lakip ang mga buluhaton sa pagdumala sa programa, sama sa paglusad sa mga programa sa pagpakaon nga nakabase sa eskuylahan, pagpakunhod ug school disaster risk reduction and management (DRRM) ug uban pang mga programa nga adunay kalabutan niini.
Giangkon ni Espina nga naglisod ang Mandaue City sa kakuwang sa AOs.
Aron matubag kini, ang mga kasamtangang AO gi-grupo sa mga cluster, nga ang matag AO responsable sa pagdumala sa mga buluhaton nga administratibo sa labing menos tulo ka mga pampublikong eskwelahan.
Bisan pa, misangpot kini sa nagsobra nga mga karga sa trabaho alang sa mga kasamtangang AO.
Ang dakbayan sa Mandaue adunay 45 ka publikong mga tunghaan, apil ang elementarya ug high school, nga adunay dul-an sa 100 ka non-teaching personnel.
Si Bianito Dagatan, Mandaue City division superintendent, niklaro nga ang mga magtutudlo gihapon ang modumala sa ilang curriculum-related nga mga buluhaton, sama sa subject coordinatorships, nga naglakip sa curriculum development ug student assessments.
Gipasabot ni Dagatan nga ilang giuna ang pagbutang og mga AO sa mga pampublikong tunghaan nga dako og populasyon, samtang ang mga AO adunay mga kahikayan sa pagbahin-bahin sa mga buluhaton alang sa gagmay nga mga tunghaan niadtong panahuna.
TUBAG
Sa managlahing pakighinabi, si Mandaue City Mayor Jonas Cortes miingon nga kinahanglan nila nga sutaon ang mga buluhaton nga nanginahanglan sa pag-apod-apod aron mahibal-an kon mag-hire ba sila og mga JO o COS nga mga personahe alang sa trabaho.
Gihatagan og gibug-aton ni Cortes nga ang assessment magdeterminar usab sa eksaktong gidaghanon sa gikinahanglan nga AOs nga nakabase sa siyudad.