Interpol mipagawas og ‘red notice’ batok Teves

Niluwat og “red notice” ang International Criminal Police Organization (Interpol) batok kang kanhi Negros Oriental representative Arnolfo Teves Jr., kinsa gikonsiderar nga pugante sa gobiyerno sa Pilipinas.

Gikompirmar kini nga taho ni Justice Secretary Jesus Crispin Remulla.

Ang color-coded notices, sumala sa Interpol website, maoy internasyonal nga mga hangyo alang sa kooperasyon o mga alerto, nga nagtugot sa mga polis sa mga nasod nga miyembro sa Interpol sa pagpaambit sa kritikal nga impormasyon nga may kalabutan sa krimen, ug gi-isyu sa General Secretariat sa hangyo sa usa ka nasod nga miyembro.

Ang red notice magtugot sa mga nasod nga miyembro sa pagpangita ug pagdakop sa usa ka tawo nga naghulat sa extradition, pagsurender o parehas nga legal nga aksyon.

Si Remulla, sa sayo pa, niingon nga si Teves katapusang nakit-an sa Timor Leste diin siya nangita og asylum apan gibalibaran.

Si Teves adunay standing warrant of arrest sa kasong murder sa pagpatay kang Negros Oriental governor Roel Degamo niadtong Marso 2023 nga miresulta usab sa kamatayon sa 11 ka mga inosenteng indibidwal.

Gilambigit usab siya sa pagpatay sa pipila ka mga indibidwal sa probinsiya sukad niadtong 2019.

Kanunay niyang gihimakak ang mga pasangil nga naglambigit kaniya sa mga insidente sa pagpatay ug nagdumili usab siya sa pagbalik sa nasod bisan pa sa mga panawagan sa mga opisyal sa gobyerno, lakip na mismo ni Presidente Ferdinand Marcos Jr.

Giangkon ni Teves nga adunay usa ka seryuso nga hulga sa iyang kinabuhi ug sa iyang pamilya, ilabi na tungod sa iyang implikasyon sa pagpatay kang Degamo, nga nahitabo samtang siya naa sa gawas sa nasod alang sa medikal nga katuyoan.

Gitudlo usab siya nga terorista sa Anti-Terrorism Council samtang ang iyang pasaporte gikanselar sa mando sa Department of Justice.