Patas-anay sa garbo, publiko nahasol kaayo

Nipasumbingay na si Cebu City Mayor Michael Rama nga dunay kausaban sa pulitikanhong alignment human siya nasilo kang Bise Mayor Raymond Alvin Garcia tungod sa pagpakigtagbo kang Gobernador Gwendolyn Garcia nga wa siya nasayod ug paghimo og lakang aron mahunong nga temporaryo ang Cebu Bus Rapid Transit project.

Gikasuko sab sa mayor ang mando sa gobernador sa pagpahunong sa trabaho sa CBRT nga naa sa luna sa Kapitolyo. Niingon si Rama nga husto na, di na siya kaagwanta sa pagpanghilabot sa gobernador sa siyudad.

Masabot kaayo ang kasuko sa mayor kay siya baya ang gidakdakan sa tanan nga kahasol sa publiko sa grabe nga kahimtang sa trapiko sa mga karsada nga naigo sa trabaho sa CBRT. Kinsa man say laing dakdakan, natural ra man nga ang mayor maoy kasuk-an kay siya ang amahan sa dakbayan.

Kon ang palpak naa sa probinsya, ang usa sa rumbuhon sa publiko mao ang gobernador. Sakto usab ang mayor nga unta siya gipahibawo kalabot sa problema.

Koordinasyon lang ang kulang, panagsultihanay sa mga lider kalabot sa problema ug sabutan kon unsay angay nga buhaton. Temporaryo bang hunungon ang trabaho o ipadayon samtang giplantsa pa ang problema?

Ang kakuwang sa koordinasyon tali sa Siyudad ug Probinsya mao ang kanunay nga babag. Sa Sinulog 2023 ug 2024, klaro kaayo nga kuwang ang panagsultihanay tali sa mga opisyal sa Cebu City ug Cebu Province kalabot sa venue ug petsa.

Karon, kani na sang isyo sa CBRT nga nasabod sa heritage law sa nasod.

Dihang nakaplagan unta ang problema, ang buhatan unta ni Gobernador Garcia nipahibawo gilayon sa buhatan ni Rama o mismo ang gobernador nakigsulti sa mayor sa problema. Kana kon wa man gani ni buhata sa Probinsya.

Unsa may mawala kon dunay koordinasyon o gipahibawo ang mayor? Kana kon tinuod ba sab nga ang Kapitolyo nidiretso sa kamandoan sa pagpahunong nga way pagpahibawo sa mayor.

Samtang iya sa Kapitolyo ang luna, ang nahimutangan niini ubos sa jurisdiction sa Siyudad.

Kapait baya, patas-anay ni sa garbo sa mga public official.