BRIDE NAKUYAPAN HUMAN NAG-‘I DO’
Nag-viral sa social media ang video nga kuha atol sa kasal ni Catherine Franks, 28, sa Louisiana State, USA niadtong hinapos nga bahin sa Pebrero 2024.
Taho sa ‘SAKSI’ sa GMA Integrated News nga wa nakaagwanta si Catherine sa tumang kainit sa venue ilabi na sab sa stress sa ilang gihimo’ng mga pagpangandam sa maong okasyon.
Nasayran nga milanat og oras ang pagbinarugay sa bride ubos sa tumang kainit sa suga sud sa simbahan.
NAHAGBA SA ALTAR
Samtang nagpadayon ang seremonyas, tulo ka mga higayon nga nawad-an og umoy si Catherine. Gani giagak siya sa iyang bana ug maid of honor kay diriyot na molukapa.
Nakurat nalang ang mga bisita ug ang pari sa dihang kalit nga nahagba ang bride atubangan sa altar, human militok sa pagsinukliay sa pulong nga ‘I do’ tali sa groom.
Nasuta nga mabdos ang bride. Mao kini ang usa sa mga hinungdan nga naglain ang iyang kabuhi.
Taliwala sa maong hitabo, nagmalampuson ang seremonyas gawas lang nga nabalda sa makadiyot human nakuyapan si Catherine.
Pagkasunod adlaw human sa kasal, nagpa check-up sa doctor si Catherine aron sa pagsiguro nga maayo ra ang kahimtang sa iyang gisabak.
Gikatakda nga sa Abril manganak ang bride.
VIRAL
Ang video sa maong kasal nga gi-share sa magtiayon sa TikTok niani og liboan ka views diin nagsagul ang reaction, adunay nabalaka ug aduna say nahimuot.
Adunay mi-comment nga dili maayo nga tilimad-on ang nahitabo nga nakuyapan ang bride atol sa seremonyas sa kasal, apan aduna say niingon nga naglain lang ang lawas sa bride hinungdan nga nakuyapan ug dili angay magtuotuo og dautan sa maong kaminyuon. /