Pagkabulay-og sa gobyerno
Human sa sinukliay og mga pulong tali nila ni Mayor Michael ug sa mga opisyal sa Kapitolyo, nisulod na si kanhi mayor Tomas Osmeña kalabot sa isyo sa Cebu Bus Rapid Transit (CBRT) project. Iyang bawion ang luna nga gidonar sa iyang amahan nga si anhing Sergio “Serging” Osmeña Jr. kon magpadayon pa ang kagubot kalabot sa CBRT.
Nihulga si Osmeña nga kon moinsister ang Probinsya sa pagpahunong sa CBRT, iyang bawion ang tipik sa Osmeña Blvd., apil na ang Fuente Osmeña nga tipik niini giingong gipanag-iya gihapon sa iyang amahan.
Matod sa kanhi mayor nga duna siyay titulo sa yuta sa Fuente ug nga ang Probinsya wa usab nakahatag sa luna baylo sa gidonar nga lote sa iyang amahan nga mao na karon ang Osmeña Boulevard.
Giluwatan kini ni Osmeña human sila si Gobernador Gwendolyn Garcia ug ang Provincial Board niawhag sa pagpahunong sa trabaho sa CBRT, kansang tipik sa luna nahasulod sa propyedad sa Kapitolyo.
Gubot pa sa lukot ang isyo sa CBRT nga padayon karon nga gitrabaho. Nalangay na kaayo ang proyekto kay usa ka dekada na unta kining nasugdan. Niburot na og maayo ang galastuhan, gikan sa P16 bilyunes, niabot na kini og P28 bilyunes.
Kon undangon ang trabaho, di ba ni pag-usik-usik lang sa kwarta nga niabot na og P1 billion ang gasto ning first phase lang? Maorag gisunog ang kwarta nga bayran pinaagi sa public fund.
Gawas pa, makadaut kini sa dagway sa kagamhanan sa natad sa international community kay international loan ang tinubdan sa pundo.
Ang nahitabo karon nagsalamin sa kabulay-og sa mga manager sa kagamhanan, gikan sa local ngadto sa national government. Karon nga nagpadayon ang trabaho, karon pa nanggawas kining mga isyo sa CBRT, gikan sa trapiko ngadto sa heritage.
Sulod sa 10 ka tuig nga kini gituki, kini nga isyo wa maapil ug mautingkay? Ngano kaha? Unya karon naglalis na? Kinsa ang napalpak, ang lokal o nasudnong buhatan?
Dinhi makita kon unsa ka bati modumala og proyekto ang kagamhanan. Grabe ang ka langay nga moresulta sa pagburot sa budget ug kon masugdan na gani, grabe ang ka langay. Gikan sa 2025 ngadto na sa 2027.
Apan sa away karon nila ni Rama ug Garcia, nga niapil na si Tomas ug nasudnong kagamhanan, kaduha-duhaan pang mahuman kini sa target tungod sa kadaghan pa sa kuwang sa proyekto.