‘Bangi’ sa 3 ka MPUJ operators resulbahon

Resulbahon sa Traffic Enforcement Agency of Mandaue (Team) ang isyo sa giingong nagsapaw nga rota sa tulo ka mga operator sa modern public utility jeepney (MPUJ) sa Barangay Cabancalan.

Si Edwin Jumao-as, pangulo sa Team, nikompirmar sa mga tigbalita sa Huwebes, Marso 7, 2024, nga ilang imbitahon ang mga representante gikan sa Pitos, Talamban, Mandaue Transport Cooperative (Pitmaco), United Driver and Operators Transport Cooperative (Udotco), ug Lapu-Lapu Mandaue Driver Operator Transport Cooperative (Lamadotrasco) aron tukion ang giingong panagbangi sa ilang operasyon.

Ang tigom gikatakda karong Marso 20, alas 9 sa buntag, sa training hall sa Team sa Barangay Centro.

KALIT MISUD?

Sa Traffic board meeting niadtong Huwebes, gituki sa team ang panagbangi tali sa tulo ka operators.

Si Jumao-as nitaho nga ang Udotco ug Lamadotrasco mipasangil sa mga modernong jeep sa Pitmaco nga kalit nga nisulod sa Cabancalan nga niresulta sa pagkunhod sa kita sa duha ka operators.

Si Hyll Retuya, assistant head sa Team, niingon nga base sa duha ka operators, nga kini nagsugod niadtong 2023.

Ang Udotco ug Lamadotrasco parehong naghupot og prangkisa sa mga jeep nga nagbiyahe sulod sa mga dapit sa Mandaue, ilabina sulod sa Cabancalan, subay sa designasyon sa rota nga gipadayag ubos sa Local Public Transport Route Plan (LPTRP) sa Mandaue.

Lakip sila sa mga jeepney operators nga nag-operate subay sa intra-city route sa Mandaue City--Cebu International Convention Center (CICC) paingon sa Banilad ug Cabancalan, CICC paingon sa Cabancalan ug Banilad, Tintay paingon sa CICC/Parkmall, ug Parkmall loop agi sa DM Cortes.

Sama sa gihulagway sulod sa LPTRP, ang mga rota sa operasyon sa Udotco naglangkob gikan sa A. Del Rosario Street hangtod sa Parkmall Mandaue sa Barangay Tipolo, samtang ang Lamadotrasco naglangkob sa mga lugar gikan sa kadalanan sa ML Quezon, Hernan Cortes, padulong usab sa Parkmall.

Ang duha ka mga operator ningpasangil nga ang mga Pitmaco jeep nisulod sa ilang gitudlo nga mga rota aron makakuha og mga pasahero nga nag-una sa dapit sa Talamban sa dakbayan sa Sugbo.

SPECIAL PERMIT

Ang Pitmaco nangangkon nga dunay special permit nga giisyu sa Land Transportation Franchising and Regulatory Board Central Visayas (LTFRB-7) nga nagtugot kanila sa pag-operate subay sa mga rota sa Udotco ug Lamadotrasco.

Ang LTFRB-7 niisyo og special permit sa mga piniling jeepneys ug bus operators aron matubag ang kakuwang sa pampublikong transportasyon sa pipila ka mga dapit sa Sugbo.