Gitinuod sa Team ang counterflow

Niinit ang isyo sa counterflow sa Dakbayan sa Mandaue human nag-viral ang video sa usa ka sports utility vehicle (SUV) nga nisugat sa mga nagmotorsiklo nga ningsubay na sa pikas lane, nga sagad mahitabo sa rush hours ug paghuot sa dagan sa trapiko.

Human niini, nipahibawo ang Traffic Enforcement Agency of Mandaue (Team) nga sila mokampanya batok sa counterflowing nga ilang gihulagway nga maoy sagad hinungdan sa mga aksidente sa siyudad.

Ang pagpanakop di yano tungod kay ilang katambayayong ang Highway Patrol Group (HPG 7) sa Philippine National Police (PNP). Di lang kay citation ticket ang ihatag sa drayber nga makalapas, Temporary Operator’s Permit (TOP) ang iisyu. Nagpasabot nga sakmiton ang driver’s license ug adto na kini lukaton sa Land Transportation Office (LTO 7) diin naghuwat ang mas bug-at nga multa.

Sulod sa pipila ka adlaw, nakadakop na ang Team og 50 ka mga nakalapas sa counterflowing sa sakyanan, kadaghanan nagmotorsiklo.

Di na ikahibulong kay naandan na nga buhat sa daghang mga nagmotor ang pagsugat sa flow sa trapiko sa kasugat nga lane. Ang uban grabe nga makapadagan ingon sa andam makigdinasmagay sa kasugat nga mga sakyanan.

Ang gibuhat sa Team maayo tungod kay gitumong kini aron paghimo sa kadalanan nga mas luwas gikan sa mga aksidente nga di lang makadaut og kabtangan, makaangol usab o kon di man gani, makakutlo og kinabuhi.

Kon sustenihan kini sa Team ug buhaton usab kini sa ubang traffic organizations sa Metro Cebu, dako ang purohan nga mominos ang gidahanon sa mga aksidente sa mga sakyanan.

Gikan sa kada adlaw nga pagpanakop, mahimo na lang unya nga panagsaan kay mahadlok na man ang mga drayber sa paglapas sa balaod sa trapiko kon daghan na ang madakpan. Mas lapad nga operasyon, mas labing maayo.

Panahon na nga tibhangan ang gidaghanon sa mga drayber nga mapasagaron, naanad na og lapas sa balaod sa trapiko. Masuko na og badlungon kay ang sayop sakto na alang nila.