KOREAN MAS DAGHAN OG FANS SA BOHOL

Vitor gibaharan nga i-knockout sulod sa 5 ka rounds

TAGBILARAN CITY, BOHOL — Nadasig tungod sa kadaghan sa iyang fans sa Bohol, kasagaran mga dalaga, si South Korean Tae Sun Kim nibahad nga iyang i-knockout sulod sa lima ka rounds ang Boholano nga si Virgel Vitor sa ilang panagsangka sa main event sa “Kumong Bol-anon XIV” sugod karong alas 6:30 sa gabii, Biyernes, Marso 8, 2024, sa Saulog Gymnasium.

Gipabuhagay kini ni Kim kagahapon, Marso 7, 2024, sa Island City Mall atol sa official press conference sa promosyon nga gipasiugdahan sa PMI Bohol Boxing Promotions.

Sa press conference, gipangutana si Kim kon nakadasig ba kaniya nga tataw nga mas daghan siya’g fans kumpara ni Vitor, kinsa usa man unta ka lumad nga taga Tagbilaran City.

Nitubag si Kim og “I love you!” nga nakapahugyaw sa iyang fans nga daw nihisama kang Kim nga usa ka K-Pop superstar.

“Filipinas sexy and beautiful,” dugang ni Kim ug naninggit na sab iyang fans.

Gipangayuan og reaksyon si Vitor kabahin niini.

“Wa nay problema nako. Daghan man gyud ang hilig anang Korean Pop,” matod ni Vitor.

Kabahin sa ilang away, gipangutana si Kim kon kaya ba niyang tumbahon si Vitor.

Nitubag si Kim og “five rounds.”

“Tan-awon lang ni nato ugma (karon). Daghan na ang nibahad nako’g knockout,” matod ni Vitor.

Sa ilang panagharong, ilugan nila ni Vitor ug Kim ang World Boxing Organization (WBO) Oriental super featherweight title.

Si Vitor naggunit og 21-3, 14KOs nga rekord samtang si Kim adunay 11-1-2, 8KOs nga baraha.

Sa co-main event, magsangka sila si Reymart “Cebuano Assasin” Tagacanao ug Indonesian Hamson Lamandau alang sa World Boxing Association (WBA) Asia super flyweight title.

Si Tagacanao adunay 7-0, 6KOs nga rekord samtang si Lamandaue adunay 12-5-1, 9 KOs nga rekord.

Sa undercard, magsangka sila si Christian Balunan (9-0, 5 KOs) batok Clyde Azarcon (17-9-1, 6 KOs), Sugarey Leonard Pores (3-0, 2 KOs) batok Jacklien Serenoso (2-2-1, 2 KOs), Richard Laspona (3-0, 2 KOs) batok Reniel Alisoso (2-2, 1 KO), Althea Shine Pores (4-0, 1 KO) batok Jessa Mae Laguindo (0-2), Arlando Senoc (1-0, 1 KO) batok Norman Rusiana (15-1) ug Leonard Pores III masubhan batok Jarel Escriber (01).

/ ERWIN S. LIRAZAN 5 ROUNDS: Nagpahulagway sila si South Korean Tae Sun Kim (wa) ug Boholano Virgel Vitor (tuo) kauban si PMI Boxing Promotions head lawyer Floriezyl Echavez Podot (tunga) human sa official weigh-in sa “Kumong Bolanon XIV” boxing promotion sa ICM Mall sa Tagbilaran City, Bohol. Sa ilang panagsangka karong adlawa sa main event sa promosyon, mibahad si Kim nga iyang i-knockout si Vitor sulod sa lima ka rounds.