Barko padayong giguba bisan sa CDO ni Chan

Kapin sa 300 ka mga residente gikan sa upat ka mga sitio sa Barangay Punta Engaño, dakbayan sa Lapu-Lapu ningpresentar og petisyon aron ipadayag ang ilang pagkadismaya sa padayong operasyon sa pagguba sa barko nga M/V Diamond Highway.

Ang operasyon gikataho’ng nagpadayon sa Sitio Proper Jansen bisan pa sa cease and desist order nga giluwatan sa Kagamhanan sa Lapu-Lapu City niadtong Enero.

Ang mga residente ningtambong sa press conference sa Arterra Hotel sa Punta Engaño niadtong Biyernes, Marso 8, 2024, aron awhagon si Lapu-Lapu City Mayor Junard Chan sa pagpahunong sa pagguba sa barko.

Matod nila nga ang operasyon makahatag gihapon og problema sa panglawas sa ilang mga anak ug pipila ka mga tigulang.

Ang mga lumulupyo sa Sityos Lupa, Colo, Proper Jansen, ug Mangal nangreklamo sa rashes sa panit ug uban pang makita nga mga sakit sa panit sukad nagsugod ang trabaho sa pagguba sa barko, nga nakamugna og fiber dust sa ulahing bahin sa miaging tuig.

OIL SPILL

Kaniadtong Disyembre 2023, pipila ka mga indibidwal ning-report nga nakasinati og mga isyo sa respiratory sama sa ubo ug sip-on, nga ilang gipasangil sa fiber dust nga anaa sa hangin.

Nagtuo sila nga ang fiber dust resulta sa recycling activities nga gihimo sa duol nga barko, nga mao ang M/V Diamond Highway. Kini nga abog namilit sa ilang mga tanom, atop, ug linabhan, ug sila nagtuo nga kini nakaapektar sa kalidad sa hangin nga ilang giginhawa.

Si Josie Hayashi, gitudlo nga barangay administrator ug residente sa Sitio Lupa, niingon nga tungod niining mga risgo sa panglawas, siya ug ang ubang mga residente ningbalhin sa mas luwas nga mga dapit aron malikayan ang mga hugaw.

Pipila ka mga residente, kinsa ningpili nga dili magpaila, nangreklamo sa grabe nga kasaba gikan sa operasyon sa pagguba sa barko. Gikataho usab nila nga nakakita sila og oil spill sa duol nga tubig sa dagat.

Niadtong Biyernes, Marso 8, si Lapu-Lapu City Councilor Jun Alforque nipahigayon usab og ocular inspection sa dapit diin gibungkag ang M/V Diamond Highway.

Atol sa usa ka inspeksyon, si Alforque, nga nagtrabaho kaniadto isip usa ka trabahante sa barko, nakadiskubre nga adunay pipila ka fiber nga basura nga wala gilabay sa husto.

Gipadayag niya ang kabalaka nga kini nga basura makadaot sa duol nga mga residente ug mga trabahante nga nagguba sa barko. Kini nga makadaut nga materyal adunay potensyal nga hinungdan sa kanser.

Gitambagan ni Alforque ang tag-iya sa barko nga makig-alayon sa Lapu Lapu City Health Office (LLCHO) ug sa City Environment and Natural Resources Office (Cenro) aron makakuha og rekomendasyon.

Matod niya nga kinahanglang tumanon sa shipping company ang bisan unsang rekisitos nga mahimo’ng ipahamtang sa City Government sa dili pa nila libkason ang cease and desist order.

Sa taho sa SunStar niadtong Pebrero 3, nipagawas og cease and desist order si Chan niadtong Enero 31 nga nagdili sa kompaniya nga nagbungkag sa barko sa pagputol sa bisan unsang bahin sa M/V Diamond Highway.

Kini agi’g tubag sa mga reklamo sa dul-an sa 200 ka mga residente sa Sitios Tulo, Lupa, ug Malingin, ingon man sa duol nga compound, nga nag-angkon nga nag-antos sa mga libagha sa panit, iritasyon sa tutunlan, ug ubo tungod sa mga abog gikan sa mga operasyon sa pagguba sa barko.

Si barangay konsehal Mark Estardo nitaho nga ang mga opisyal sa Cenro, LLCHO, ug Department of Environment and Natural Resources (DENR) nipahigayon og mga test aron masuta ang kaluwas sa tubig duol sa barko.

Sa dihang gipangutana bahin sa kaluwasan sa mga mangaligo, ang Public Information Office sa Dakbayan namahayag nga walay mga resort nga nahimutang duol sa ship-breaking area.

Si Agnes Realiza, pangulo sa Lapu-Lapu City Health Office, nikompirmar sa phone interview sa SunStar Cebu niadtong Pebrero 14 nga walay nadawat nga reklamo gikan sa mga apektadong residente human unang nabalita ang insidente niadtong Pebrero.

Ang SunStar Cebu nisuway usab sa pagkontak sa Cenro aron makuha ang resulta sa gipahigayon nga test, apan wala pa silay tubag.