40 ka LGU ming-nominate og beneficiaries sa ‘Negosyo’

Mokabat sa 40 ka local government units (LGUs) ang nisumiter og mga nominasyon alang sa mga prospective micro-entrepreneur nga mahimo’ng benepisyaryo sa programa sa Cebu Provincial Government nga “Obra Negosyo Eskwela”.

Atol sa Joint Council Meeting sa Social Hall sa Kapitolyo niadtong Miyerkules, Marso 6, 2024, si Provincial Board Member Glenn Soco sa Cebu Sixth District nipahibawo kang Gobernador Gwendolyn Garcia ug sa mga mayor sa mga lungsod ug dakbayan nga ningtambong nga mokabat sa 92 ka promising micro-enterprises ang mosalmot sa programa .

Ang tumong sa programa mao ang pagtabang sa mga benepisyaryo sa pagpalambo sa ilang kasamtangang negosyo uban sa suporta sa academic community, business sector ug Provincial Government.

Gianunsyo ni Garcia ang paglusad pag-usab sa iyang mugna nga programa niadtong Septiyembre 8, 2023.

Ang programa unang gipaila niadtong 2010 ug gitapos niadtong 2013, sa samang tuig nga natapos ang iyang tulo ka mga termino isip gobernador sa probinsiya.

Si Soco nitaho atol sa komperensya nga 66 ka student teams, matag usa gilangkuban sa lima ka mga estudyante ug usa ka student officer, ang gisumiter na sa academic community aron ipakatap ug papuy-on sa nagkalain-laing lungsod ug siyudad.

Ang napili nga micro-traders ug student teams magtinabangay sa pagpalapad sa ilang mga negosyo, uban sa tabang sa Mandaue Chamber of Commerce and Industry (MCCI).

Atol sa tigom, si Garcia nipahibawo nga tungod kay dunay mga LGU nga nakasumite og kapin sa duha ka mga negosyo, makigtagbo siya pag-usab sa MCCI aron mahuman ang proseso sa pagpili niining 92 ka mga negosyo.

Dugang pa niya nga kini nga mga pinili nga negosyo i-assign nga parehas sa 66 ka mga team sa estudyante, nga ipahibalo sa Abril 2024.