Good work, Team
Human sa subsob nga kampanya batok sa counterflowing, ang Traffic Enforcement Agency of Mandaue (Team) nakasikop na og gatusan ka mga motorista nga malapason. Ang nakaanindot ug makapahadlok sa ilang kampanya kay giabagan sila sa Highway Patrol Group (HPG 7).
Unpopular kaayo sa kinabag-an sa mga motorista ang counterflowing. Bisan gani sa ubang sektor kini gisaway tungod sa kakuyaw niini. Ang kampanya gilusad human sa nag-viral nga video sa usa ka sports utility vehicle nisubay sa lane diin ningsuway pag counterflow ang mga nagmotorsiklo.
Di kadto unang video nga nag-viral labot sa counterflow kay dunay nag-una apan ingon sa Luzon nahitabo.
Sa post sa Superbalita Cebu sa Facebook page niini, gatusan ka mga netizen ang nakadayeg sa gibuhat sa Team. Kinabag-an kanila nangindahay nga buhaton usab kini sa ubang traffic agencies sa Metro Cebu aron mabadlong kining kuyaw nga buhat sa mga tigmotor.
Naobserbahan sa Superbalita Cebu nga daghan gihapon ang mang counterflow sa north road, gikan sa Jagobiao ngadto sa Basak, Dakbayan sa Mandaue. Hayan nanimpalad sila nga di mabantayan.
Ang reaksyon sa post ning mantalaan nagpakita sa kadakong supak sa publiko ning makuyaw nga buhat sa mga tigmotorsiklo ug uban pang mga rider nga nagbuhat sa counterflowing nga ingon sa normal na kini.
Daghan sa four-wheeled nga mga driver ang nakuyawan ug nabalaka kaayo ning mao nga buhat tungod kay bisan ang ni counterflow maoy sad-an gyud unta kon sila nadasmagan, ang nakaigo maoy mapriso ug makabayad. Dugay na silang nangindahay nga unta dunay traffic agency nga mokampanya batok sa counteflow. Karon nga naa na, namakpak sila og maayo.
Kuyaw na daan ang mga karsada sa Metro Cebu tungod sa kadaghan sa mga sakyanan, gisamutan pa kini sa maisip nga reckless driving nga mao ang counterflowing. Kay gadali kuno sila. Asa man, padung sa ospital o sementeryo?
Ning kampanya sa Team, hinaot pang mahimo kining ehemplo sa ubang sama nga ahensya.