P3.8 milyunes nga shabu nasakmit; ‘Yawa’ nasikop

Moabot ngadto sa P3.8 milyunes nga balor sa ilegal nga drugas ang nasakmit sa kapulisan sa Dakbayan sa Sugbo sa duha ka managlahi’ng anti-illegal drug operations nga kabahin sa Simultaneous Anti-Criminality and Law Enforcement Operation (SACLEO).

Unang nadakpan ang usa ka giilang tigas sa Sitio Cogon, Barangay Labangon, Dakbayan sa Sugbo alas 11:24 sa Lunes sa gabii Marso 11, 2024 nga giila nga si Albert Kinn Devellirez Punay, alyas “Boss Yawa”, 20, nagpuyo sa maong lugar.

Nakuha sa mga operatiba sa Labangon Police Station ang mga pinutos sa gituohang shabu nga mobalor og P408,000, lakip na ang buy-bust money.

Ang mga operatiba sa Station Drug Enforcement Unit sa Labangon Police Station sa pagpangulo ni Police Lieutenant Raymart Rabanes ubos sa supervision ni Police Major Eraño Regidor nilusad sa buybust human nakadawat og impormasyon labot sa kalambigitan ni Boss Yawa sa ilegal nga drugas.

Matod ni Regidor nga bag-o lang nakagawas sa Cebu City Jail ang suspek sa susama gihapon nga kaso apan na-monitor nila nga nibalik sa pagpamaligya sa ilegal nga drugas.

“Bag-o pa nang laya nya namonitor namo nga mibalik pagduwa mao to among gi buy bust,” matod ni Regidor.

Pagka alas 2:30 sa Martes sa kaadlawon, Marso 12, 2024, nakasakmit usab ang Inayawan Police Station og mga binulto sa gituohang shabu nga motimbang og 505 gramos nga dunay standard drug price (SDP) nga P3.4 million atol sa gilusad nga buy-bust sa Sitio Tugas, Brgy. Cogon Pardo, Dakbayan sa Sugbo.

Ang suspek giila nga si John Rey Labra Tello, alyas John, nga nalakip sa high value individual nga nagpuyo ra usab sa maong lugar.

Giandam na ang kaso nga ipasaka sa kapulisan batok sa duha ka mga suspek.

Tungod niini, matod ni Police Lt. Colonel Janette Rafter, deputy city director for operations sa CCPO, nga nidayeg ang ilang hepe nga si Police Colonel Ireneo Dalogdog sa accomplishment sa iyang mga personnel.

Gawas sa ilegal nga drugas, ila usab nga gipatutokan ang illegal numbers game diin nakalusad sila og 25 ka operations nga niresulta sa pagkasikop sa 29 ka mga sugarol.

Naka-serve usab sila og walo ka mga warrant of arrest sa mga akusado nga dunay mga pending nga kaso sa korte apan lima lang ang nadakpan.