Center island sa MC Briones-UN Ave. sa Mandaue tangtangon
Ipatangtang sa Mandaue City Government ang mga center island sa intersection sa MC Briones-UN Avenue, lakip na ang mga traffic light sa tunga-tunga sa highway aron mamenosan ang kahuot sa trapiko.
Atol sa tigom sa Kapitolyo niadtong Lunes, Marso 11, si Mandaue City Mayor Jonas Cortes nipaambit niini nga impormasyon ngadto kang Gobernador Gwen Garcia.
Anaa usab sila si Chief Gumer
Castillo sa DPWH Sixth Engineering District ug Brando Ryan, legal officer sa DPWH 7.
Ang pagtangtang sa mga center island ug traffic signal sa intersection sa MC Briones Street ug UN Avenue, atbang lang sa Pacific Mall sa Barangay Maguikay, makadugang og mga lane sa matag kilid sa national road ug kalugakan ang dagan sa dagan sa trapiko sa maong lugar.
“There are certain mga islands, mga traffic lights nga atong i-relocate. I-relocate para sa volume sa atong traffic sa intersection mapadak-an, mapalapdan nato ang intersection,” pasabot ni Cortes sa Sugbo News.
Sa pagkakaron, duha na lang ka lanes ang matag kilid sa MC Briones paingon sa lungsod sa Consolacion.
Samtang, si Engr. Castillo namahayag nga ang DPWH Sixth Engineering District mo-apply og asphalt overlay aron mapadali ang paghuman sa road construction sa Mandaue City subay sa gipasar nga resolusyon sa Provincial Development Council (PDC) niadtong Marso 6.
Ang PDC, pinangulohan ni Gobernador Garcia, nipalabang og resolusyon nga naghangyo sa DPWH, nga nagtrabaho sa mga proyekto sa Sugbo, nga usbon ang mga plano sa proyekto ug pilion ang asphalt overlay kay sa pagkonkreto, ilabi na sa mga dalan nga maisip nga maayo na ang kahimtang.
Gihangop ni Mayor Cortes ang maong lakang sanglit mas paspas ang pagtrabaho sa aspalto kon itandi sa mga proyekto sa pagkonkreto.
Ang DPWH adunay ubayubay nga mga proyekto sa pag-aspalto nga gilinya diha sa Central Nautical Highway sa Mandaue City, gikan sa Brgy. Tipolo ug Jagobiao paingon sa sikbit nga lungsod sa Consolacion.