Kinsay reckless, sad-an sa bangga?

Daghan na ang nangamatay sa mga vehicular accident. Sa miaging tuig, dunay adlaw nga tulo ka mga tawo ang nangamatay sa managlahi nga mga aksidente sa lainlain nga mga dapit. Sagad ani nga mga aksidente naglambigit sa counterflow, kun usa sa mga sakyanan nisulod sa pikas, kasugat nga lane, nga niresulta sa panagbangga sa duha ka mga sakyanan.

Ang usa sa grabeng panagbangga tungod sa counterflowing mao ang aksidente nga nikalas og tulo ka mga kinabuhi sa mga motorcyclist.

Apan kon kinsa may sad-an, sa mga mata sa balaod, ang korte ra ang makasulti kon legalidad ang hisgutan. Sa mga mata sa ordinaryong mga motorista, ang nakasala mao ang ni counterflow. Kay kinsa pa man diay? Apan kon adunahan ang ni-counterflow, mahimo ra niya ning atubangon sa korte.

Kay hasol na man, sagad ang mga nakabangga mao pay mo-settle na lang sa kaso bisan ang ni counterflow maoy sinugdanan sa hitabo.

Apan makapaguol kaayo kay daghan sa naghimo aning counterflowing nagtuo nga entitled o ilang katungod ang paghimo niini. Masuko gud kon badlungon. Ehemplo ini mao ang viral video sa usa ka nagmotorsiklo nga wa nipahawa atubangan sa usa ka four-wheeled nga sakyanan bisan naa siya sa opposing lane, diin dunay duha ka mga yellow nga linya. Sa ato pa, klaro kaayo nga siya ang nakalapas sa balaod sa trapiko, siya pa ang nangisog.

Wa siya nag-inusara, sagad sa mga drayber nga nag-counterflow nagtuo nga okay ra ang ilang gibuhat kay sila nagdali. Way naigo. Naghuwat pa diay nga dunay maigo? Duna bay exemption ang balaod? Wala. Patas ang tanang mga motorista sa karsada.

Nahimo lang kini nga naandan ug natural ang counterflowing kay gipasagdan sa traffic offices. Hinuon, di tanang mga karsada nga kini gidili, kay dunay mga agianan sa mga sakyanan nga kini gitugot, apan kinahanglan nga magmatngon lang.

Taliwa sa mga aksidente sa counterflow, kinsa man ang reckless, ang ni-counterflow o ang gikabangga nga driver?