Nakatikas og P1.5M nga gasolina gamit ang card

Usa ka 45-anyos nga babaye nga taga Nebraska nag-atubang og kasong kriminal tungod sa giingong paggamit og buslot aron mangawat og kapin sa 7,000 ka galon sa gas nga nagkantidad og kapin sa $27,000 (P1.5 million), sumala sa mga taho sa media.

Ang babaye giakusahan sa dili husto nga paggamit sa iyang reward card gikan sa Pump and Pantry sa Lincoln, Nebraska, labing menos 510 ka higayon sulod sa unom ka bulan, gitaho sa KOLN-TV.

Kasagaran wala’y dautan sa paggamit sa usa ka reward card, apan giingon sa kapulisan nga gipahimuslan sa babaye ang pag-update sa software gikan sa Nobiyembre 2022 nga nagdumala sa mga order ug mga reward card sa fuel pump, matod sa sibyaanan sa TV.

Wala nahibal-i sa Bosselman Enterprise, tag-iya sa Pump and Pantry, ang update nagtugot ni kinsa nga nag-swipe sa ilang reward card kaduha nga ibalhin ang gas pump gikan sa regular nga mode ngadto sa demo mode, taho sa WILX-TV.

Samtang sa demo mode, libre nga gas mahimo’ng ihatag, matod sa estasyon sa telebisyon.

Gawas sa paggamit sa rewards card 510 ka higayon, giakusahan siya nga nagpabayad sa iyang paghatag sa iyang card ngadto sa laing babaye alang sa libreng gas, ang report sa WILX-TV.

Ang babaye giingong nibayad og $500 alang sa $700 nga kantidad sa gas gikan sa reward member.

Sa unsang paagi nasakpan ang babaye nga nag-abuso sa mga reward card?

Ang kapulisan sa Lincoln niingon nga ilang nasakpan ang babaye sa akto sa dihang ilang gisusi ang surveillance footage ug nakita siya nga nagbomba og gas sa iyang sakyanan sa makadaghang mga higayon, sumala sa WILX-TV.

Giila sa kapulisan ang babaye gamit ang iyang rewards card nga impormasyon ug mga rekord sa korte, matod sa estasyon sa TV.

Sa dihang giinterbyu siya sa kapulisan sa Lincoln, gisultihan niya ang mga detektib nga usa ka tawo nga nibayad sa utang nga awto nihatag kaniya sa reward card imbes nga salapi, gitaho sa WILX-TV.

Wala makontak sa kapulisan ang maong lalaki tungod kay siya namatay niadtong Enero.

Ang kapulisan sa Lincoln nagtuo nga ang babaye nakakuha og libreng gas gikan sa Nobiyembre 13, 2022, hangtod Hunyo 1, 2023, ang taho sa KOLN-TV.

Ang mga imbestigador nag-ingon nga ang babaye nakakuha og 7,413.59 ka galon nga libre nga gasolina, nga giingon sa tagdumala sa gas station nga nagkantidad og $27,860.27 nga nawala, dugang sa istasyon sa TV.

Ang babaye gidakop niadtong Marso 6 sa kasong pagpangawat ug gihatagan og $7,500 nga bond, sumala sa KOLN. Wala siya nalista ingon usa ka piniriso sa prisohan sa Lancaster County kaniadtong Lunes. / REV gikan sa USA Today