Tun-i una ang skywalks, ayaw gub-a dayon

Gusto ni Cebu City Mayor Michael Rama nga panggub-on ang tanang skywalks sa Dakbayan sa Sugbo human niya gipangtangtang ang unang duha nga naigo sa Cebu Bus Rapit Transit (CBRT).

Tinuod nga kadaghanan sa skywalks way gamit, apan duna say pipila. Sama sa unang duha nga gipangguba nga gipanggamit sa mga tinun-an sa Cebu Normal University (CNU) ug Abellana National School ingon man sa pedestrians sa Fuente Osmeña, kadtong sa rotunda dapit.

Mao na nga base aning duha ka mga skywalk, di maayo nga general na ang pagtan-aw sa mayor sa matag skywalk. Kinahanglan nga particular ang paglantaw pinaagi sa pagtuon kon kini nagamit ba sa iyang katuyoan.

Sama sa skywalk sa Gaisano Country Mall nga gamit kaayo sa tanang klase sa pedestrians, labina sa mga tinun-an ug trabahante. Mayoriya sa pedestrians naggamit nianang skywalk sa mao nga dapit.

Kon gub-on, asa nan man lang sila mangagi? Kuyaw kaayo na nga karsada ang Banilad-Talamban tungod sa kadaghan ug kakusog makapadagan sa mga driver sa mga sakyanan.

Pulihan sa mayor og underground nga mga agianan ang mga skywalk. Sa di pa kini niya buhaton, di una gub-on ang mga skywalk nga agianan sa mga tawo. Sama nianang sa Country Mall kay magbutang kini sa kakuyaw sa ilang kinabuhi. Busa mas maayo nga sa mga dapit nga gamit kaayo ang skywalk, unahon ang paghimo sa tunnel nga agianan sa mga pedestrian. Seguraduhon nga di kini bahaan kon magbunok ang uwan.

Sakto man tuod ang obserbasyon sa mayor tungod kay dunay mga skywalk nga gihimong puy-anan sa mga makililimos ug himoanan ug mga krimen, apan duna say gigamit sa mga pedestrian alang sa ilang kaluwasan.

Busa mas maayo nga tun-an una asa ni nga mga istruktura ang way gamit sukad pa kaniadto. Mao ni ang angay nga unahon. Ipabilin ang kadtong gamit kaayo ug una ra bungkagon kon dunay alternatibong agianan.