‘Mastermind’ sa krimen, nasikop

Duha ka giingong nag-unang utok sa pagpatay kang Lapu-Lapu City Market Consultant Christopher Ceniza niadtong Enero ning tuiga ang nasikop sa Lapu-Lapu City Police Office (LCPO) nunot sa paggawas sa warrant of arrest sa korte ning semanaha.

Atol sa press conference sa Biyernes, Marso 15, 2024, gikompirmar sa mga awtoridad ang pagkatawo sa mga suspek nga sila si Helen Mandal Cañete, hepe sa clearing team sa siyudad, ug usa sa iyang mga personnel nga si Reynan Imbong Maloloy-on.

Nasikop sila si Cañete ug Maloloyon human sa pagpagawas sa warrant of arrest ug sa tulo nila ka mga kauban nga sila si Aldrin Peñaranda Dungog, Rodel Asuque Mojado, ug Carl Tapales Dungog sa Regional Trial Court Seventh Judicial Division Branch 71 niadtong Huwebes, Marso 14.

Sa miaging mga taho, si Aldrin Dungog, nga nagtrabaho isip drayber sa clearing team, maoy giingong middleman sa krimen. Si Mojado, nagtrabaho isip barangay tanod sa Barangay Looc, giila nga drayber sa getaway vehicle nga gigamit sa mga suspek, samtang si Carl Dungog maoy gunman.

Sila si Aldrin ug Carl unang gidakop tungod sa managlahing mga salaod.

Si Aldrin nasikop sa illegal possession of firearms, samtang si Carl nasikop sa kasong drug offense ubos sa section 5 sa Republic Act (RA) 9165 o Comprehensive Dangerous Drugs Act of 2002 niadtong Enero 9.

Si Mojado ni-surrender kang LapuLapu Mayor Junard

“Ahong” Chan sa samang adlaw ug gipaubos sa iyang proteksyon ug gi-turnover siya sa awtoridad.

Niadtong Biyernes, si Police Lieutenant Colonel Christian Torres, tigpamaba sa LCPO, nipahibawo nga ang pagkasikop sa lima ka mga suspek sa kaso nagpasabot nga ibalik na nila sa korte ang warrant of arrest.

Gipahibalo sa korte nga ang mga suspek maoy manubag sa krimen ug nga makapadayon kini sa legal nga proseso niini.

Matod ni Torres, nakakita ang korte og igong ebidensiya, probable cause, ug reasonable degree of certainty nga nagpunting sa pagkalambigit sa mga suspek.

Si Torres namahayag nga adunay arraignment ang mga suspek, ug human niini, ang prosekusyon maoy magdeterminar ug mo-apply sa korte kon kinsa sa mga suspek ang makonsiderar nga star witness.

Sila si Cañete ug Maloloy-on nagdumili sa paghatag og komento sa mga pasangil batok kanila.

“Nagmahay ko kay kaduha gyod ko gihagad ni Aldrin dili unta ko pag una unya ana man sila nga vendor ra kuno niya kadiyot ra kuno kaayo,” matod ni ni Mojado.