150 MW solar power plant tukuron sa Daanbantayan

Aron mapalambo ang renewable energy sa amihanang Sugbo, ang Kagamhanan sa Probinsiya mopirma og landmark deal tali sa Consortium Acciona Energia Global ug Freya Renewables Inc. karong Sabado, Marso 16, 2024.

Sa report gikan sa Cebu Provincial Government Public Information Office sa Huwebes, Marso 14, 2024, ang umaabot nga deal mosilyo sa pagtukod sa 150 megawatts (MW) nga solar power plant nga tukoron sa Barangay Talisay, lungsod sa Daanbantayan.

Ang Probinsiya sa Sugbo makigtambayayong sa Acciona Energia Global nga nakabase sa Spain ug Freya Renewables Inc. nga nakabase sa Makati aron matubag ang nagkataas nga panginahanglanon sa enerhiya sa Sugbo.

Giimbitar si Energy Secretary Raphael Lotilla sa pagsaksi sa pagpirma sa Memorandum of Agreement (MOA) sa Sabado, Marso 16, 2024.

Ang Kapitolyo maoy mopalit sa lote ug propyedad, diin ang mga kompaniya sa enerhiya maoy motukod gamit ang 185 ka ektarya sa pasilidad nga way gasto ang Kagamhanang Probinsiyal.

Niadtong Oktubre 2023, ang tulo ka partido ningpirma og memorandum of understanding (MOU) nga naglakip sa porsiyento nga maoy bahin sa Kagamhanan sa halin sa kuryente sa pasilidad.

Gidugang sa taho nga si Daanbantayan Mayor Sun Shimura nakigtagbo kang Cebu Governor Gwendolyn Garcia sa Kapitolyo sa Miyerkules, Marso 13, ug ang nahauna nitug-an sa gobernador nga suportado niya kini.

Tungod niini, giawhag ni Shimura ang apektadong mga tag-iya sa lote nga ibaligya ang ilang mga luna sa Probinsya.

Agi’g balos, ang gobernador nipasalig nga ang mga tag-iya sa propiedad makatagamtam og tax exemption sa capital gains, transfer tax, ug documentary stamp.

Dugang ni Garcia nga iyang unahon ang mga tag-iya og lote sa pagpangita og mga kahigayunan sa trabaho alang kanila.