15 ANYOS GIPUSIL, PATAY

Patay ang usa ka 15 anyos nga lalaki human pusila sa wala pa mailhing mamumuno sa Tabor Hills, Purok 3, Barangay San Jose, dakbayan sa Sugbo, ala 1:00 sa kaadlawon, Sabado, Marso 16, 2024.

Ang biktima giila lang sa alyas nga ‘Res’ nga taga Barangay Bacayan, dakbayan sa Sugbo.

Matod pa, kauban sa biktima ang laing tulo ka mga lalaki nga iyang mga higala nga pulos mga menor de edad nga giingong nagsuroy-suroy maong dapit nga naghukas sa ilang sapot ug ang ilang sinina gitabon sa ilang nawong.

Sa pasiunang imbestigasyon sa kapulisan, ang maong mga batan-on gidudahan nga responsable sa pagpangawat sa mga gamit sa mga sakyanan nga nag-park sa maong lugar panahon sa kagabhion.

Matod pa, sa dihang ningduol ang maong mga menor de edad sa mga motorsiklo ug sakyanan nga gi-park, kalit lang nga dunay buto-buto sa armas.

Mao kini hinungdan nga nagdinaganay ang maong mga batan-on, apan si Res ang nahabilin human naigo sa bala sa pusil.

Ang laing tulo ka mga kauban naabot og panagan sa Purok 1 sa samang barangay.

Matod sa usa sa mga higala niini, nabati niya ang singgit sa biktima nga si Res nga nag-ingon nga “aray!” ug dayong kahagba niini.

Sa pagka alas 5:00 sa kaadlawon, nibalik ang tulo sa dapit ug ilang nakita ang biktima nga nagbuy-od na nga wala nay kinabuhi.

Nanawag dayon sila og mga barangay tanod ug sila na usab ang nipahibawo sa Emergency Medical Services (EMS) nga mao na usab ang nideklarar nga patay na ang biktima.

Lima ka basiyo sa bala sa kalibre .45 ang nakuha sa mga sakop sa Scene of the Crime Operation (Soco) sa Philippine National Police (PNP) Forensic Unit 7.

Matod ni Police Major Janelito Marquez, hepe sa

Talamban Police Station, ang biktima ug ang tulo ka higala niini maoy gidudahan nga responsabli sa kawat sa mga part sa sakyanan nga mag-overnight parking sa usa ka pribadong luna sa Barangay San Jose.

Gani matag gabii duna siyay mga personnel nga gitahasan nga mo-roving subay sa daghang reklamo sa kawat nga hinimoan sa mga batan-on.

Tungod niini, nagbutang nag CCTV camera ang mga residente aron mabantayan nila kinsa ang kanunay nga mangawat sa battery sa ilang sakyanan ug uban pang gamit. Gisusi ni Marquez ang CCTV

video ug nasuta nga nangabot ang maong mga batan-on sa dapit nga ala 1:00 na sa kaadlawon ug gipangtabonan ilang nawong sa sinina aron dili sila mailhan.

“Gipabuthan sila mao to nga nanagan apan naigo tong usa, sila na ang permi madudahan sa mga kawat diha sa lugar kanang mga sakyanan nga mag-parking diha ba,” matod ni Marquez.

Sa pagkakaron, wala pa silay matumbok nga responsabli sanglit sa kuha sa CCTV wala makita ang namusil.

Ang tulo ka higala sa biktima nga pulos menor de edad nagkanayon atol sa interview sa DyHP gikan matod pa sila sa Purok 1 kay namilar sa patay ug miadto sila sa Tabor Hills kay duna silay sugaton nga mga babaye.

Sa maong lugar, matod pa sila mag-inom og ilimnon nga makahubog apan sa pag-abot nila sa dapit, kalit lang nga duna silay nabati nga buto-buto sa armas.

“Pag-abot namo aron sugaton tong mga chicks ba, buto-buto na among nabati, nanagan dayon mi unya misinggit ni among kauban nga agay, nidiretso nami sa purok uno wala nami mobalik kay nakuyawan naman mi,” matod sa higala sa biktima.

Nagpadayon ang gihimong imbestigasyon ang Talamban police labot sa hitabo ug gipang subay pa ang laing kuha sa CCTV camera ilabi na sa mga silingang establisemento. /