Ang mabulokon nga tryout sa CEC

Dili man tuod sama sa unang adlaw ang gidaghanon apan gidugokan gihapon ang gipahigayong tryout sa Cebu Eastern College (CEC) sa mga bata diha sa ilang gym sa Dimasalang Street corner Leon Kilat, dakbayan sa Sugbo.

Kon sa miaging Sabado mokapin sa 1,000 ang nanimpad, kagahapon sobra sa 500 ang nitunga.

Hinuon ang training director nga si Mark Anthony Tallo, kanhi sakop sa Philippine team, mibutyag nga ning higayona wala nila giapil ang 18-under nga mga mi-tryout.

Kini gitumong ni Tallo aron sa paghashas kon kinsa ang angay molangkob sa CEC team sa umaabot nga mga tournament sama sa Cebu

Schools Athletic Foundation, Inc. (Cesafi) elementary division, Cebú City Olympics, Online Basketball League (OBL) ug uban pa.

Dili lang diay gikan sa dakbayan sa Sugbo ang nangapil, kon dili aduna usay taga Bohol, Siquijor ug Leyte.

Sagad nila giabayan gyud og mga ginikanan kinsa masabot nga mipakita sa ilang hugot nga suporta sa tagsatagsa nila ka mga anak.

Maklaro ang ilang katuyoan. Dili sila gusto nga masaag ngadto sa dautang bisyo ang ilang mga anak, mao nga todo suporta sila niini kay kini maoy oportunidad nga mawahing ang ilang interest ngadto sa sports.

Daghan man tuod ang maingon nato nga dili pa gyud madala, pero makapakurat ang gipakita sa pipila niini nga mora nag season nga moduwa.

Gani pipila nila ang makamao na nga mo Euro step.

Pasabot kini nga adunay mga batan-on karon nga may igong talento o abilidad nga wala lang mahatagi og higayon.

Sa gihimo ni Tallo uban sa iyang assistant coaches nga sila si Rodmark del Rosario, Dax Abacila ug Karenrick Dela Cerna, posibling kini maoy mag-abli og oportunidad nga mobukhad ang ilang talento.

Kini maoy unang tryout sa eskuwelahan nga sakop sa Cesafi ning tuiga.

Sa umaabot nga season, ang Cesafi, sa unang higayon, aduna nay 15-under category nga idugang sa 12-under.

Sa miaging tuig, ang CEC maoy nangharos ug midominar sa 12-under category ug di unya ikasurprisa nga mao usab kini ang mahimo sa ilang 15-under team.

Sa mga wala madala, hinaot nga mahimo kini nilang hagit ug inspirasyon sa sunod pa nilang pagsuway.

Dili kini maoy katapusan nga mahatagan og katumamanan ang ilang damgo.

Sa mga ginikanan, halayo pa man tuod, apan ang pagkabig sa interest sa inyong mga bata ngadto sa sports dako na kaayong insentibo nga nakuha sa pagsalmot sa tryout.

Ayaw undanga ang inyong suporta ug giya kanila.