Bus gibira pinaagi sa bungot?
Usa ka Ukranian nga lalaki ang nibuak sa world record human gibira niini ang usa ka bus nga adunay gibugaton nga kapin sa 2 mil kilos gamit ang iyang bungot.
Nailhan ang kusgan nga 35 anyos nga lalaki nga si Dmytro Hrunskyi human natala sa Guinness World Record (GWR) ang iyang malampusong tahas.
Nisuway siya sa maong tahas niadtong 2019 apan napakyas kini human nangalarot ang iyang mga bungot, sumala sa GWR.
Matod ni Hrunskyi ngadto sa GWR, human sa kapin tulo ka tuig sukad sa iyang pagsuway niadto nga iyang gipatas-an ang iyang bungot ug nag-eksperimento siya niini sa nagkadaiyang paagi, aron kini nga mas kusgan sama sa usa ka pisi.
Ning higayuna, nagmalampuson siya ug iya gyud nabira ang minibus nga adunay gibug-aton nga 2,580 kilos.
Nalabwan niya ang kanhi record sa Lithuanian nga si Antanas Kontrimas human nibira sa sakyanan nga may gibug-aton nga 1,952 kilos mga usa na ka dekada ang nilabay.
Apan wa nihunong si Hrunskyi bisan pa nabuak na niya ang record.
Human niini, nisuway sab siya og bitad sa pinakabug-at nga sakyanan nga may 7,760 kilos nga gibug-aton pinaagi sa iyang li-og.
Siya maoy labing unang tawo nga nakabuhat sa ingon.
Sa video, makita nga grabe gyud ang iyang paningkamot nga mapalihok ang maong sakyanan hangtod lima ka metros gamit ang pisi.
Niadtong 2022, nabuak sab niya ang record sa pagbitad sa pinakabug-at nga tren nga may gibug-aton nga 32,500 kilos gamit ang iyang liog.
Gawas niini, aduna na siya pito ka records sa pinakadaghang sakyanan nga nabitad pinaagi sa iyang mga ngipon.
Base sa taho sa GWR nga ang mga sakyanan adunay mga drayber sa sud niini.
Ang kanhi record niini mao ang unom ka sakyanan nga gidungan og bitad niadtong 2022.
“My hobby is extreme power tricks, and my goal is to be a multiple record holder,” sumala niya sa GWR.
Dugang niini nga kanunay siyang nagbansay aron makabuak og record ug makahimo og bag-o.
“I dedicate this record to my country, Ukraine, which has been fighting for more than a year and does not give up,” paambit niya. ■