2 ka mga ‘kawatan’ nasikop

Lalaki nga giingong notado nga manglungkabay nasikop sa mga estambay human nisulod sa usa ka boarding house sa Urgello Street, Sitio Upper Kawayan, Brgy. Sambag 1, Cebu City sa alas 10:30 sa Lunes sa buntag, Marso 18, 2024.

Ang suspek giila nga si Renuj Buaya, 24, taga Sitio Sagrada, Brgy. Tinago, Cebu City.

Sa imbestigasyon sa Abellana Police Station sa Cebu City Police Office sa pagpangulo sa hepe niini nga si Police Major Mark Don Alfred Leanza, nasuta nga duha ka mga tinun-an sa University of Cebu ang nabiktima.

Unang biktima mao ang 19 anyos, diin ang iyang fixie nga bisekleta nga mobalor og P8,000 unang gikuha sa suspek.

Gibutang kini sa kwarto sa biktima ug gisunod sa pag sulod ang laing kwarto sa laing tinun-an nga 23 anyos pinaagi sa pag guba sa lock sa pultahan.

Gikuha ang laptop nga mokantidad og P37,000 dayong sulod sa back pack.

Sa pagsibat, gisakyan pa sa suspek ang bisekleta apan nabantayan sa uyoan sa ikaduhang biktima nga mao nay nangayo og pakitabang sa mga silingan.

Malampuson nga nadakpan si Buaya ug gi turn-over sa Abellana Police Station alang sa pagpasaka og kaso.

Subayon pa sa kapulisan kon ang suspek mao bay responsabli sa mga kawat sa mga boarding house sa dalan Urgello ug sikbit nga mga barangay.

Samtang laing suspetsadong kawatan nga nisulod sa barracks sa usa ka construction site ug nanguha og mga gamit sa construction nadakpan sa mga trabahante ala 1:40 sa Lunes sa hapon, sa dalan Juana Osmeña, Brgy. Capitol Site, Cebu City.

Ang suspek giila nga si Francis Jake Bunal Padayao, 26, taga V. Rama St., Brgy. Calamba, dakbayan sa Sugbo.

Matod sa in-house contractor nga si Elmer Lagahed Matobato, 50, taga Cagayan de Oro, nisulod sa barracks ang suspek nga wala nila mabantayi pinaagi sa pag guba sa pultahan.

Gipanguha sa suspek ang duha ka Bosch Electric Drill nga mokantidad ang tanan og P5,700 ug duha ka electric grinder balor og P2,100 nga iyang gisulod sa sako.

Human napusasan ang suspek, gidala nila kini sa Abellana police station aron pasakaan og kasong pagpangawat.