Karsada gub-on aron marijuana mahunong
Copenhagen, Denmark - Ang mga lumolupyo sa gawasnon ug pinasagdan kaayo nga kasilingnan sa Christiania nagplano sa pagguba sa karsada nga ginganlan og Pusher Street.
Mao kini ang ilang labing uwahi nga lakang aron mahunong na ang gipasagdan nga pagpamaligya og hashish kun marijuana.
Ang pagpamaligya sa marijuana nga gipasagdan na sa katuigan nisangpot sa away sa teritoryo ug dunay mga higayon nga nisangpot sa duguon nga komprontase tali sa mga gang ug kapulisan.
Ang mga residente sa dapit nga gipuy-an sa mga hippie nanawagan alang sa mga boluntaryo nga motabang sa pagkalot sa kadalanan unya sa Abril 6, matod sa mantalaan nga Berlingske kaniadtong Huwebes.
Ang tanan giaghat sa pag-apil ug ang mga partisipante tugotan nga makadala sa cobblestones niini isip souvenir. Dili pa klaro kon unsa ang ipuli sa dalan.
Ang mga lumulupyo nakig-away aron mapreserbar ang reputasyon sa Christiania isip usa ka “free-wheeling society” nga gilangkuban sa mga ideyalista sa politika ug nagkatigulang nga hippie.
Sulod sa katuigan, ang marijuana gibaligya nga dayag sa Christiania gikan sa mga stall sa daplin sa dalan, taliwala sa mga building nga gipintalan sa psychedelic nga mga kolor.
Apan ang mga lumulupyo niingon nga ang nag-away nga mga gang, dili sila, ang nagkontrolar sa pamatigayon ug ang kaluwasan sa ilang komunidad nagsandig sa paghunong na niini.
Ang kasilinganan usa ka kalibutan nga lahi sa ubang mga dapit sa Copenhagen sukad niadtong 1973, sa dihang ang mga hippie nag-squat sa usa ka gubaon nga naval base.
Ilang gitukod ang usa ka komunidad nga gipahinungod sa mga flower-power ideals nga popular sa panahon: libre nga marijuana, limitado nga impluwensya sa gobyerno, walay mga sakyanan ug walay polis.
Human matapos ang kapin sa upat ka dekada nga panagsungi tali sa mga otoridad, gihatagan sila og kontrol sa ilang mga balay sa dihang gibaligya sa estado ang 84-acre (24-ektarya) nga komunidad og 85.4 milyunes ka kroner ($12.5 milyunes) ngadto sa usa ka foundation nga gipanag-iya sa mga lumolupyo niini.
Adunay dul-an sa 700 ka mga hamtong ug 150 ka mga bata nga nagpuyo sa komunidad karon, ug kini usa sa labing dako nga atraksyon sa turista sa kapital sa Denmark.
Ang “mga Kristohanon” mihimo og daghang mga pagsulay sa pagsira sa merkado sa marijuana sa halos 100 ka metros nga gitas-on sa dalan.
Matod sa kapulisan nga ang milyunes nga balor sa patigayon gikontrolar sa Hells Angels ug ang ilegal nga Loyal to Family.
Gitugot sa mga otoridad ang pagpamaligya sa marijuana sa Christiania hangtod sa 2004, sa dihang nagsugod ang mga polis sa pagsumpo.
Aron mapugngan ang pagatake sa mga polis, giguba sa mga residente ang mga booth sa marijuana, apan ang pagpamaligya sa wala madugay mibalik.
Sa miaging tuig, nagdala sila og heavy machine aron gub-on ang merkado apan gipugngan sila sa mga tawo nga nagmaskara./