Tanyag ni Garcia nakahayag sa expressway

Grabe na kaayo ang trapiko sa national highway sa eastern side sa Cebu Island, labina sa habig sa Metro Cebu. Busa, pipila ka mga tuig ang nakalabay, ang Dept. of Public Works and Highways (DPWH) niduso sa paghimo sa Metro Cebu Expressway nga manukad sa Dakbayan sa Naga padulong sa Dakbayan sa Danao.

Ang 73 kilometro nga karsada gilauman nga mopaluag sa daan karon nga highway kay duna na may alternatibo nga agianan ang mga sakyanan gikan sa habagatan padulong sa amihanan ug vice versa.

Apan dunay dako nga babag ang proyekto. Nag-una mao ang gasto kay binilyon ka pesos ang gikinahanglan gikan sa panudlanan sa kagamhanan. Sa pagbukas lang gani sa pipila ka kilometro nga bahin sa expressway sa habig sa Naga, tagi-tagi ang pagpagawas sa pundo.

Lain nga problema mao ang kakuwang og koordinasyon sa DPWH tali sa mga local government unit (LGU) nga gireklamo na sa pipila ka mga opisyal. Bisan gani si Gobernador Gwendolyn Garcia nahingangha sa kausaban sa lagbasan sa karsada nga gihimo sa departamento nga wa sila nasayod.

Karon, si Garcia nitanyag sa DPWH mga mohulip paghupot ang Probinsya sa proyekto pinaagi sa public-private partnership (PPP).

Mas maayo pa nga ang Kapitolyo maoy tugyanan niani nga proyekto kay namatud-an na man niini ang maayo nga pagdumala sa road projects sa kalungsoran ubos sa pamunoan sa gobernador. Segurado usab nga hapsay ang koordinasyon tali sa mga LGU, di sama karon nga sama sila og nagmata sa buntag, mahingangha na lang kalabot sa road project.

Komon kaayo nga reklamo sa mga LGU mao ang kakuwang sa koordinasyon sa DPWH tali kanila hinungdan nga magkaproblema, sama sa road projects nga nakamugna og kahuot sa trapiko.

Kon ang Kapitolyo na ang modumala ug iagi og PPP ang proyekto, dako ang kahigayunan nga mapaspasan pa kini ug di maabtan og usa ka siglo una pa mahuman. Ang tanyag ni Garcia mao ang naghatag og kahayag nga madayon ang expressway nga miungot sa City of Naga.