Chan: Socialized housing tukuron

Gipahibalo sa Kagamhanan sa Dakbayan sa Lapu-Lapu ang plano sa pagtukod og lima ka andana nga residential buildings sa Sitio Sta. Maria, Barangay Pusok.

Kini nga mga istruktura magsilbi nga permanenteng puy-anan sa mga residente nga nawad-an sa ilang puy-anan tungod sa dako nga sunog kaniadtong Disyembre 12, 2023.

Bag-ohay lang gibutyag ni Lapu-Lapu City Mayor Junard “Ahong” Chan sa pakighinabi sa media sa Lapu-Lapu City Hall niadtong Martes, Marso 19, 2024, nga kasamtangan siyang nakigsabot sa mga tag-iya sa pribadong lote sa Sitio Sta Maria.

Naglaum ang mayor nga iyang makombinsir kini nga modonar og di mominos 5,000 square meters sa luna aron tukuron ang socialized housing.

Gipadayag ni Chan ang iyang paglaum nga makuha ang pagtugot sa mga tag-iya sa lote aron masugdan na ang pagtukod sa socialized housing karong tuiga.

Iyang gitumbok nga ang City Government nakig-alayon sa Department of Human Settlements and Urban Development (DSHUD) sa pag-finance sa housing project, hinuon wala pa gibutyag ni Chan ang eksaktong kantidad sa pundo.

GIAMENDAR

Gipahibalo usab ni Chan nga giamendar sa Konseho sa Dakbayan ang kasamtangang ordinansa nga nagmando og moratorium sa pagtukod og mga condominium, subdivision ug socialized housing projects, aron ma-exempt ang Sta Maria socialized housing.

Ang sunog nga miigo sa Sta Maria usa ka semana sa wala pa ang Pasko sa 2023 nipabakwit sa gibana-bana nga 1,400 ka pamilya (7,870 ka indibidwal), sumala sa Public Information Office sa Siyudad.

Si Mark Anthony Bautista, public information officer nga nahinabi sa Superbalita Cebu sa Huwebes, Marso 21, nga pipila sa apektado’ng mga residente namalik sa ilang mga probinsya human nakadawat og daghang cash assistance.

Dunay mga residente nga ninggamit sa P15,000 nga abag sa tulo ka buwan gikan sa Lapu-Lapu City Disaster Risk Reduction and Management Office (LCDRRMO) aron mobalhin sa ubang mga dapit.

Giila sa Siyudad ang 561 ka apektado’ng mga tag-iya sa balay sa Sitio Sta. Maria ug padayon nga gi-reblock ang lugar.

Sa 561 ka panimalay, 460 lang ang tugutan nga makabalik sa lugar ug makatukod og temporaryong kapuy-an samtang naghulat sa socialized housing project.

/GIKAN SA JUNARD CHAN FB PAGE SOCIALIZED HOUSING: Si Lapu-Lapu City Mayor Junard “Ahong” Chan nakigtagbo sa mga lumolupyo sa sityo Sitio Sta. Maria, Barangay Pusok aron pahibaw-on sa iyang tinguha sa pagtukod og socialized housing uban sa pag-abag sa usa ka nasudnong ahensya.