Picture sa boarding pass gigamit; nasakpan kay way lingkuranan

Usa ka lumolupyo sa Texas ang giakusahan nga nisulay sa paglusot sa usa ka flight pinaagi sa pagkuha og litrato sa boarding pass sa laing pasahero.

Ang mga otoridad niingon nga siya nadakpan tungod kay ang flight puno ug wala siyay lugar nga kalingkuran.

Karon ang mao nga tawo nag-atubang sa usa ka kaso kay siya stowaway sa usa ka eroplano.

Si Wicliff Yves Fleurizard sa George, Texas, gidakop niadtong Dominggo human nisakay sa Delta Air Lines nga eroplano sa Salt Lake City paingon sa Austin, Texas, matod sa federal prosecutors sa Utah.

Sumala sa affidavit sa usa ka polis nga gisang-at sa federal district court, si Fleurizard nisakay sa eroplano ug giablihan ang pultahan sa usa ka storage space alang sa emergency equipment.

Gitabangan siya sa usa ka flight attendant nga makaadto sa lavatory sa atubangan sa eroplano.

Human nakasakay ang tanan, si Fleurizard nibalhin sa usa ka lavatory sa likod sa eroplano.

Sa iyang paggawas - niining puntoha, ang eroplano nagsugod na sa pagdagan paingon sa runway - gisultihan niya ang usa ka flight attendant nga naa siya sa lingkuranan nga 21F.

Aduna nay usa ka tawo sa lingkuranan 21F, usa ka babaye nga nagbiyahe nga nag-inusara, ug gikumpirma sa flight attendant nga siya usa ka pasahero nga adunay tiket.

Sa dihang gitan-aw sa mga tripolante, ang ngalan ni Fleurizard wala makita sa mga rekord alang sa Austin-bound flight “o bisan unsang ubang Delta Flight alang niini,” sumala sa affidavit.

Nibalik ang eroplano sa gate, diin naghulat ang mga opisyal.

Sumala sa reklamo, usa ka pag-review sa surveillance footage gikan sa boarding area nagpakita nga si Fleurizard nikuha og mga hulagway sa daghang mga cell phone sa mga pasahero ug mga boarding pass kon wala sila magtan-aw, dayon gigamit ang iyang telepono isip boarding pass aron makasakay sa eroplano.

Nasayran nga usa ka higala nihatag kang Fleurizard og buddy pass aron makalupad sa Southwest Airlines, apan ang duha ka nangaging mga flight napuno ug siya gi-rebook sa usa ka flight pagkahuman sa Dominggo, sumala sa opisyal sa kapulisan.

Walay nalista nga abogado alang sa maong lalaki.