Kanhi Cebu City councilor gikiha

Kanhi konsehal sa dakbayan sa Sugbo nag-atubang og reklamo atubangan sa piskaliya sa Pasay City tungod sa giingong pagkuha og mga hulagway ubos sa sayal sa usa ka babaye nga abogado sa wala pa ang biyahe paingon sa Sugbo didto sa Ninoy Aquino International Airport (NAIA) niadtong Pebrero 2024.

Si Maria (dili tinuod ngan) nipasaka niadtong Marso 19, 2024 sa mga kaso batok kang Nendell Hanz Abella tungod sa giingong paglapas sa Section 4(a) Republic Act (RA) 9995, o ang Anti-Photo and Video Voyeurism Act of 2009 , ug Section 4 sa RA 11313, o ang Safe Spaces Act.

Kini ang ikaduhang pagpasaka ni Maria sa mga kaso. Una niyang gisang-at ang iyang mga reklamo batok kang Abella ngadto sa LapuLapu City Prosecutor’s Office, nga gibasura tungod kay wala kini hurisdiksyon.

Si Abella ni-resign isip konsehal sa dakbayan sa Sugbo niadtong 2017 human siya gitudlo ni Presidente Rodrigo Duterte nga commissioner sa 7th Division sa National Labor Relations Commission (NLRC).

Duha ka higayon nga gikontak sa SunStar Cebu si Abella pinaagi sa Facebook Messenger aron makuha ang iyang pamahayag, apan walay tubag.

Sa iyang complaint-affidavit, si Maria niingon nga didto siya sa NAIA niadtong Pebrero 12.

Samtang sakay sa ayroplano paingon sa Mactan-Cebu International Airport sa LapuLapu City, nihunong si Maria sa aisle kay nagkarga og mga bagahe ang laing pasahero sa iyang atubangan ngadto sa overhead baggage cabin.

Namatikdan niya sa ulahi si Abella nga naggunit sa iyang

cellphone sa dili natural nga paagi nga nagsugyot nga nagkuha siya usa ka litrato o video sa ilawom sa iyang sayal.

Sa dihang giatubang ni Maria, gihimakak ni Abella nga nagkuha siya og mga hulagway ug video.

Gipakita dayon niya ang usa ka walay sulod nga gallery sa imahe sa iyang telepono, usa ka iPhone.

Gi-report dayon ni Maria ang insidente ngadto sa usa ka flight

attendant, kinsa mi-report niini ngadto sa lead cabin crew.

Sa pag-abot sa MCIA, ang

flight attendant nipahibawo kang Maria sa pagduol sa senior flight officer aron isaysay ang mga panghitabo.

Ang biktima kauban sa mga

flight attendant ug usa ka security officer nga nihangyo kang Abella nga ibutyag ang image gallery sa iyang telepono.