Imbong: Partial operation sa CBRT kaduha-duhaan

Ang partial operation sa Cebu Bus Rapid Transit (CBRT) project nga unang package, nga gikatakda sa Hulyo 2024, dili pa sigurado hangtod ning panahuna.

“Ni commit ta’g July pero naay stoppage nga nahitabo, normal nga ma-delay jud, pero bisan tuod wala sila nakatrabaho didto, naa paman lain nga stations nga angay trabahuon,” matod ni Norvin Imbong sa phone interview sa mga miyembro sa sa media sa Lunes, Marso 25, 2024.

Isip tubag sa cease-and-desist order, si Imbong niingon nga nangayo na sila og clearance sa Philippine Historical Commission.

Bisan pa sa nagpadayong panagbingkil tali nila ni Gobernador Gwendolyn Garcia ug Mayor Michael Rama, nipasalig si Imbong nga magpadayon sila sa ilang trabahong sibil.

Matod niya dihang nadawat nila ang notice sa pagpahunong sa construction, igo lang silang nibalhin ug nagtrabaho sa bus station duol sa Cebu South Bus Terminal (CSBT).

Matod niya nga mabantayan nga hapit na mahuman ang bus station duol sa CSBT, matod pa nga ila na nga gipahimutang ang mga atop.

Matod niya nga sa una wala sila’y problema bahin sa pagbutang sa estasyon sa bus, giingon nga wala sila gialerto sa Cultural and Heritage Affairs Office (CHAO) sa Cebu City kaniadtong 2020 sa ilang pagpresentar sa plano.

“Ang nahitabo, sa among hunahuna, pag-present namo sa CHAO, kon naa jud mi violation gipangayoan na unta mi og unsa na, wala man gud,” matod ni Imbong.

Dugang ni Imbong nga ang mga kondisyon lang nga gihatag kanila mao ang dili pagguba sa mga estruktura nga adunay historical values.

Moabot og 120 metros ang gilay-on sa bus station gikan sa Kapitolyo, wala gyud sila magtuo nga aduna silay violation, sumala ni Imbong.

Sa dihang gipangutana kon dili ba sila makapadayon sa ilang civil works tungod sa cease-and-desist order, si Imbong niingon nga ilang gitahod ang mosyon nga gipresentar sa gobernador ug niingon nga balido kini tungod kay wala sila makakuha og clearance.

Matod niya nga gitambagan sila sa ilang mas taas nga mga opisyal sa pagkuha sa gikinahanglan nga mga permit, nga naglaum nga makuha nila kini sa labing madali.

Ang CBRT nga proyekto naigo sa daghang mga paglangan sukad nga kini gipatuman kaniadtong 2016.