Patay’ng lawas napalgan sa dauban og basura

Lawas sa usa ka lalaki napalgan sa Sitio Golibas, Barangay Bonbon, bukirang dapit sa dakbayan sa Sugbo alas 8 sa Martes sa buntag Marso 26, 2024 human na missing sayo ning buwana.

Usa niya ka kauban nga kaduha na gipatawag sa kapulisan kalabot sa pagka missing wa na igkita sa Martes, Marso 26, 2024.

Ang biktima giila sa iyang mga kabanay nga si Adriano Fuentes Durano, 50, taga Sityo Kanyasan, Barangay Bonbon.

Matod ni Police Major Philip Libres, hepe sa Malubog Police Community Precinct sa interbyo sa Superbalita Cebu, nga dunay nanawag nga nipahibawo kanila nga adunay lawas nga napalgan.

Nakaplagan ang lawas ni Adriano sa dapit nga gihulagway nga labayanan og basura human nakita ang iyang tiil nga nigimaw sa maong lungag.

Niadtong Marso 5, 2024, wala na nahiuli sa ilang balay ang biktima. Gani, ila kining gi-post sa social media aron manawagan niadtong posibleng nakakita kaniya.

Matod pa ni Libres nga ang mga anak ni Adriano ningdangop kanila.

Niasoy si Libres nga magtulo ka adlaw sila nga ningtabang og pangita kang Adriano apan wa nila makit-i.

Apan bisan pa niini, si Libres niingon nga ang mga anak ni Adriano way hunong sa pagpangita sa ilang amahan hangtod nga niadto sila sa usa ka bungtod sa Bonbon sa Martes.

Ilang gitan-aw ang usa ka abandunadong lungag sa minahan sa carbon ug didto unang nakit-an ang tiil sa ilang amahan nga nigimaw, ang lawas baho ug nadugta na.

Si Libres niingon nga ni-request na siya og autopsy sa lawas ni Adriano aron masayran unsay iyang namatyan, kon duna bay foul play o wala.

KAUBAN

Matod sa anak nga babaye sa biktima nga si Lucia sa interview sa sibyaanang dyHP RMN Cebu nga ang niila sa lawas sa iyang amahan mao ang iyang maguwang lalaki nga si Rey, 20, tungod sa gisul-ob nga short pants.

Gihulog sa lawom nga bahin sa yuta diin gipasuk ang ulo sa bangag sa yuta ug gitabunan sa mga basura ug giingong gisuwayan pa sa pagsunog.

Nagtrabaho sa Golibas flower farm ang iyang amahan isip tigbisbis sa mga tanom sa maong lugar.

Katapusan nga nakit-an ang biktima niadtong Marso 5 nga kauban ang usa ka alyas Junel, trabahante ra usab sa maong farm, nga nag inom.