LTO: Paper-printed driver’s license ilisan na og plastic card

Nipahibalo ang Land Transportation Office (LTO) sa Miyerkules, Marso 27, 2024, nga ang pag-ilis sa tanang paper-printed driver’s license ngadto sa aktwal na nga plastic cards magsugod sa Abril 15, 2024.

Sa interbyo sa radyo, ang hepe sa LTO nga si Assistant Secretary Vigor Mendoza II niingon nga ang mga drayber nga naisyuhan og paper-printed nga lisensiya kinahanglan lang nga mobalik sa nag-isyo nga buhatan sa LTO alang sa ilang paghulip.

Gipadayon sa ahensya ang pag-isyu og driver’s license cards human gilibkas sa Court of Appeals (CA) ang writ of preliminary injunction batok sa paghatod sa plastic cards.

Si Mendoza niingon nga usa ka milyon ka pirasong plastic card gikan sa 5.2 milyunes ka cards ang nakuha gikan sa Banner Plastics Inc. na-deliver na ngadto sa LTO central office niadtong Lunes, Marso 25, 2024.

Ang pag-isyo sa injunction order naggumikan sa reklamo nga gisang-at ngadto sa Quezon City Regional Trial Court (QC-RTC) sa napildi nga bidder nga AllCard Inc., nga nangangkon nga gihikawan sila sa due process dihang gi-disqualify sila sa Department of Transportation (DOTr) sa proseso sa bidding.

Ang DOTr niingon nga ang AllCard Inc. napakyas sa pagtuman sa pipila ka mga kontrata niini sa gobyerno.

Sa wa pa niluwat og injunction order, duha na ka milyon ka plastic cards ang na-deliver na ngadto sa LTO.

Sa ilang kamandoan, ang CA niingon nga ang QC RTC dili na unta mo-entertain sa kaso sa unang bahin human napakyas ang Allcard, Inc.

Namatikdan niini nga kinahanglan una nga iapela sa kompaniya ang diskwalipikasyon sa Bids and Awards Committee sa DOTr.

Niadtong Septiyembre 2023, gipalugway sa LTO ang validity sa mga driver’s license.

Hangtod sa Marso 2024, ang backlog sa LTO alang sa mga plastic license card naa sa kapin sa 2.5 milyunes.

PAGBAG-O

Gi-reschedule sa LTO ang renewal sa mga driver’s license nga ma-expire gikan sa Abril 1 hangtod Agusto 31, 2023, ug gikan sa Abril 1 hangtod Abril 30, 2024, nga mahitabo gikan sa Abril 15 hangtod Abril 30, 2024.

Ang mga lisensya sa pagmaneho nga adunay expiration date gikan sa Septiyembre 1 hangtod sa Disyembre 31, 2023, ug Mayo 1 hangtod sa Mayo 31, 2024, gikatakda nga ma-renew gikan sa Mayo 1 hangtod sa Mayo 31, 2024.

Ang mga lisensya sa pagmaneho nga mo-expire gikan sa Enero 1 hangtod Marso 31, 2024, ug gikan sa Hunyo 1 hangtod Hunyo 30, 2024, mahimong ma-renew gikan sa Hunyo 1 hangtod Hunyo 30, 2024.