Ginang nakuhaan og P7.1M shabu sa Bohol

Laing minilyon nga balor sa ilegal nga drugas ang nasakmit sa kapulisan sa lungsod sa Dauis, Isla sa Panglao, Bohol atol sa gilusad nga buy-bust alas 10:55 sa Miyerkules Santo sa gabii, Marso 27, 2024, sa Purok 2, Brgy. Poblacion sa maong lungsod.

Ang suspek giila nga si Nilfa Limbo, 56, lumad nga taga Leyte, apan kasamtangan nga nagpuyo sa Brgy. Sucat, Parañaque City.

Nakuha sa mga polis ang dagkong mga putos sa gituohang shabu nga dunay gibugaton nga 1,050 grams nga dunay standard drug price (SDP) nga P7,140,000.

Sa impormasyon sa Bohol Police Provincial Office (BPPO) nga i-deliver ang supply sa ilegal nga drugas sa maong lungsod sa usa ka personalidad.

Atol sa pakisusi, ang nihatag og mando kaniya nga dalhon ang ilegal nga drugas mao ang usa ka binilagngo sa New Bilibid Prison sa Muntinlupa City.

Nailhan na sa BPPO kinsa ang modawat sa supply sa drugas sa Dauis apan wala lang una nganli sa kapulisan samtang nagpadayon pa ang ilang imbestigasyon.

‘COURIER

Samtangdrug courier ug collector sa halin sa ilegal nga drugas nadakpansa gilusad nga buy-bust sa mga sakop sa Parian Police Station sa alas 8:10 sa Biyernes Santo sa gabii, Marso 29, 2024 sa Sitio Lower Lumar, Barangay T. Padilla, Dakbayan sa Sugbo.

Ang suspek giila nga si Marc Jhozel Masriscal, alyas Mawmaw, 28, taga Cahipa St., Brgy. Hipodromo, dakbayan sa Sugbo.

Nakuha sa kapulisan ang duha ka dagkong putos sa gituohang shabu ug usa ka gamay nga pakete nga motimbang og 10 gramos nga dunay standard drug price (SDP) nga P68,000.

Samtang pagka alas 11:10 sa gabii, laing drug personality sa Brgy. Hipodromo gi-buy bust sa Parian Police Station.

Ang suspek giila nga si Ismael Salonoy Inopiquez, alyas “Michael Jackz”, 57, taga Cahipa St. sa maong barangay.

Nasakmit sa kapulisan ang walo ka pakete sa gituohang shabu nga motimbang og 10 gramos nga dunay SDP nga P68,000.

Kasamtangan nga gipangbalhug sa Parian custodial facility ang duha ka drug personalities nga pulos giila nga mga street level individual.

Matod ni Police Major Henry Orbiso, hepe sa Parian Police Station, nga nagpadayon ang ilang pakisusi kinsa ang tinubdan sa supply sa ilegal nga drugas nga nakuha sa mga suspek. /