Pamalandong, kasaulogan sa Semana Santa
Unsa’y pulong nga angay ipahinungod kabahin sa Semana Santa, pamalandong o kasaulogan?
Sa relihiyusong mga Katoliko, labing seguro pamalandong maoy haom nga tubag sa pangutana. Panahon kini sa solemneng pangamuyo, paghinulsol, paghatag og sempatiya sa kasakit nga giantos sa Ginoo aron maluwas kita’ng mga tawo sa mga kasal-anan nga nabuhat ning kalibutan.
Apan sa mga Katolikong nagbakasyon, nagtagay, nag-videoke, naglulinghayaw, nangaligo’g dagat ug unsa pa diha nga kalingawan, unsa kaha ang ilang matubag?
Hinuon, dili angay hukman ang usa ka tawo basi sa iyang gipangbuhat sa Semana Santa.
Aduna diha, bisan sa lahi nga mga adlaw, grabe ka relihiyuso hilabi na ning panahon sa Semana Santa apan inig abot sa ilaha, hayan mamalikas, mag-marites sa mga silingan, ug magbuhat og dili maayo sa isig ka tawo.
Aduna sab diha, bisan panahon sa Semana Santa, dili makabisita sa simbahan apan maayo og mga binuhatan.
Unsa man gyud diay tuod ning Samana Santa?
Matod pa sa wikipedia, mao kini ang ikaunom ug katapusang semana sa lent season.
Unsa man sab ning lent season? Panahon kini sa pagpangamuyo, fasting, pagpanghatag og tabang nga magsugod sa Miyerkules sa Badlis ug mahuman sa Huwebes Santo. Mao kini ang panahon sa pagpangandam alang sa pagkabanhaw sa Ginoo gikan sa kamatayon human Siya gilansang sa krus.
Ang Semana Santa magsugod sa Palm Sunday nga nagsilbeng kasaulogan sa paghiabot ni Hesus sa Jerusalem diin gihangop ug gibayaw Siya sa katawhan.
Daghang mga sugilanon nga nalatid ning maong semana apan ang nakatatak gyud tingali sa alimpatakan sa kadaghan mao ang kasakit ug pagsakripisyo sa Ginoo aron kita maluwas.
Dili lalim ang giantos sa Ginoo gikan sa iyang pagpas-an sa bug-at nga krus hangtod na sa iyang pagkalansang sa krus alang kanatong katawhan.
Angayan lang sab gyud tingali nato siyang suklian pinaagi sa pagsunod sa iyang mga pulong.
Apan yuna ra, diin man diay tuod mo sa miaging Semana Santa? Sa inyong kaugalingon na lang ibutyag ang inyong tubag ning maong pangutana ug hinuktuki ang inyong tubag.