Pasigarbo sa Sugbo ipadayon

Pasigarbo sa Sugbo o Festival of Festivals karong tuiga ipahigayon ning tuiga.

Kini maoy gianunsyo ni Cebu Governor Gwendolyn Garcia atol sa iyang pagdiskurso sa Sugat-Kabanhawan Festival Showdown sa lungsod sa Minglanilla.

“Kini tingali ang labing tukma nga higayon nga atong dunggon ang singgit sa katawhan, ang hangyo sa atong mga kabataan, ug ang naghatag og garbo sa matag Sugbuanon. Karong tuiga, pangandam, champion (Minglanilla), kay mobalik ang Pasigarbo sa Sugbo 2024!,” matod ni Garcia niadtong Dominggo, Marso 31, 2024.

Sa miaging tuig, nipadayag si Garcia nga posibling hunungon na ang pagpahigayon sa maong kalihukan tungod sa pagkasugamak sa kontrobersiya sa Pasigarbo sa miaging tuig.

Nakontrobersiya ang kalihukan tungod sa “technical glitches” nga niresulta sa repeat performances gumikan sa pagkapawong sa mga musical background niini.

Ang hitabo niresulta sa re-computation sa mga score sa mga contingent human sa kontrobersyal nga palpak sa mga presentasyon.

Atol sa maong kompetisyon, gideklarar nga mananaug ang contingent sa Sugat-Kabanhawan sa lungsod sa Minglanilla.

Si Bokal Red Duterte nga maoy pangu sa committee on tourism sa Provincial Board nipadayag sa kalipay ug pagkasurpresa sa anunsyo sa gobernador.

Inisyal na nga gihisgutan sa komitiba ang adlaw sa pagpahigayon sa Pasigarbo sa Sugbo nga sagad itumong sa Agusto atol sa month-long celebration sa founding anniversary sa Probinsya.

Sa kasamtangan wala pa’y dugang detalye alang sa kalihukan apan posible nga sa usa sa mga lokalidad gihapon sa probinsya ipahigayon ang kalihukan.