Naglagiting nga kainit

Dili mabangbang ang kainit sa adlaw bisan pipila lang ka gutlo nga mabuwad. Risgo sa panglawas ug dili maayo sa kinaiyahan tungod sa pagkunhod sa tinubdan sa tubig. Ang Philippine Atmospheric, Geophysical, and Astronomical Services Administration (Pagasa) nakatala na og 36 degrees centigrade nga temperatura. Ang imong pamati sa kainit sa alas 10 sa buntag ngadto sa alas 3 sa hapon murag na og nagkayo.

Unsa na kaha sa sunod buwan? Ang labing taas nga temperatura gibana-bana sa Pagasa nga moabot og 50 degrees centigrade nga masinati sa Mayo. Dakong kalamidad ang nag-ung-ong.

Hinaut nga dili kini mahitabo uban sa atong pag-ampo sa Kahitas-an. Takos kini sa ‘oratio imperata’ sa simbahan sa paglaum nga masanta kini nga panghitabo sa Labaw’ng Makagagahom.

Ug tungod sa naglagiting nga kainit, unang 22 ka mga local government unit (LGUs) ningsuspenso sa face-to-face nga klase ug mobalhin sa modular sama sa pandemic.

Sa Biyernes, Abril 5, 2024, si Gobernador Gwendolyn Garcia nimando na sa pagsuspenso sa klase sa tanang ang-ang sa mga tunghaan sa lalawigan.

Samtang, ang nag-unang water distribution agency sa Sugbo nga Metropolitan Cebu Water District (MCWD) nakasinati og dakong pagkunhod sa tinubdan sa tubig.

Kon magpadayon ang tumang kainit nga gipasamot sa El Niño phenomenon, ang mga tinubdan sa tubig posible nga mouga, labina sa Sugbo nga daan nang apiki sa tubig.

Apektado kaayo niini ang agrikultura. Gani, walo ka mga bukirang barangay sa dakbayan sa Sugbo ang gideklarar ni Mayor Michael Rama nga ubos sa state of calamity.

Wa kitay igong gahom sa pagsanta sa lihok sa kinaiyahan gawas sa pagpangandam. Ang ting-init normal matag tuig. Dili usab unang higayon nga nakasinati kita sa El Niño. Ang kwestiyon sa LGUs, wa mangandam sa pasidaan sa Pagasa?

Wa kitay mahimo, matag usa kanato responsable. Mohimo’g diskarte ubos sa naglagiting nga kainit sa adlaw.