LBJ, CURRY MANGULO SA TEAM USA
Pangulohan nila ni LeBron James sa Los Angeles Lakers ug Stephen Curry sa Golden State Warriors ang puwersa sa Team USA nga mohamag sa 2024 Paris Olympics.
Naa sab sa team sila si Joel Embiid sa Philadelphia 76ers, ang mga pambato sa Phoenix Suns nga sila si Kevin Durant ug Devin Booker, Tyrese Haliburton sa Indiana Pacers, Anthony Edwards sa Minnesota Timberwolves, Bam Adebayo sa Miami Heat, Anthony Davis sa Lakers, ug ang mga sinaligan sa Boston Celtics nga sila si Jayson Tatum ug Jrue Holiday.
Ang USA Basketball nagbilin una og usa ka bakanteng puwesto alang sa 12-man roster.
Mogiya isip headocach sa Team USA mao si Warriors coach Steve Kerr samtang magsilbe niyang assistants mao sila si Los Angeles Clippers head coach Tyronn Lue, Miami Heat head coach Erik Spoelstra ug
Gonzaga coach Mark Few.
Sila si Tatum, Durant, Booker, Holiday ug Adebayo nahilakip sa puwersa sa Team USA nga nakalangkat og gold medal sa miaging edisyon sa Olympics nga gipahigayon sa Tokyo, Japan niadtong 2021.
Mao pa lang kini ang labing unang pagbalik ni James sa Olympics human niya naagak ang Team USA sa gold medal niadtong 2012 sa London. Ning higayuna, kauban ni James si Davis.
Ang Paris maoy ikaupat nga Olympics ni James, kinsa nakadaug sab og gold medal niadtong 2008 ug bronze medal niadtong 2004.
Sa ilang bahin, mao kini ang labing unang Olympics nila ni Curry, Embiid. Edwards ug Haliburton. Sila si Haliburton ug Edwards mao lang ang mga magduduwa ning grupoha nga sakop sa Team USA nga wala nakalabni og medalya sa 2023 FIBA World Cup.