Mikawat sa cellphone sa polis, nadakpan
Nadakpan sa hot pursuit human ang suspek sa pagkawat sa cellphone sa usa ka polis nga nadestino sa City Mobile Force Company (CMFC) sa Cebu City Police Office (CCPO).
Ang suspek giila nga si Arnel Perales Pacaña, 36, taga Barangay Lorega San Miguel, dakbayan sa Sugbo.
Ngan sa polis gipugngan subay sa hangyo niini.
Sa imbestigasyon sa Abellana Police Station sa CCPO nga nahitabo ang pagpangawat alas 3 sa kaadlawon sa Lunes, Abril 15, 2024, sa dihang aksidente nga nahabilin ang cellphone nga mokantidad og P26,000 sa ibabaw sa motorsiklo sa polis nga gipark sa Dan Ramos, Barangay Santa Cruz.
Gisubay sa biktima ang kuha sa CCTV camera sa dapit ug nasuta nga gikuha kini sa suspek.
Human mailhi ang suspek, gilusad dayon ang hot pursuit ug pagka alas 9:30 sa Martes sa buntag, Abril 16, 2024, nadakpan niya kini duol sa Eden Lodge sa Dalan Colon, Barangay Parian, dakbayan sa Sugbo.
Nabawi sa biktima ang iyang cellphone human niangkon ang suspek nga iya ning nabaligya sa Barangay T. Padilla ug kon kinsa ang iyang nabaligyaan.
Matod ni Police Major Mark Don Alfred Leanza, hepe sa Abellana Police Station, nga samtang naka beat patrol ang maong polis sa dapit, ni-park siya sa iyang motorsiklo duol sa Robinsons sa Dalan F. Ramos .
Tungod kay hugot nga gidid-an ang tanang polis nga magdala og cellphone, gibilin niini ang iyang cellular phone sa motorsiklo.
Apan wala siya nakabantay nga gipanid-an ra usab diay siya sa suspek nga sa iyang pagtalikod, nipuli usab ni ug gikuha ang iyang cellphone.
Gitakda nga pasakaan og kasong pagpangawat ang suspek ug gipangsubay pa kon duna pa bay laing nabiktima niini.