Nigerian national sakpang nangawat

Usa ka Nigerian national nga giakusahang nangawat og mga mahalong butang sa iyang kauban nga nagpuyo sa usa mga condominium sa Sitio Pailob, Barangay Sambag 2, dakbayan sa Sugbo napusasan human naaktuhan nga padung na niya kini ibaligya sa usa ka mall sa dan Leon Kilat.

Ang suspek nga nabalhug sa Abellana Police Station mao si Chidera Nwike, 23, usa ka medical student, kasamtangan nga nagpuyo sa Aspire Homes sa nahisgutang dapit.

Sa imbestigasyon sa kapulisan, ang biktima giila nga mao si Philippe Gabule Akut, 25, taga Cagayan de Oro City, kasamtangan usab nga nagpuyo sa Aspire Homes.

Asoy sa biktima, niadtong Martes sa gabii, Abril 16, 2024, natulog siya ug diha pa ang iyang mga gamit apan pagmata niya sa alas 7:00 sa buntag, Miyerkules, Abril 17, 2024, nangawagtang na.

Kini naglakip sa Macbook Air M1 nga mobalor og P55,000; Ipad Air 4 balor og P32,000; POCO X3 nga nagkantidad og P13,000 ug Xiaomi Pad 5 tablet nga nagkantidad og P17,200.

Nangawala usab ang iyang importante nga mga identification (ID) card ug ATM card.

Dali nga nagpatabang ang biktima sa usa ka polis nga naa usab nagpuyo sa condominium.

Dali’ng gisubay ang GPS sa Macbook ug nasuta nga naa kini sa sulod sa usa ka mall sa Dan Leon Kilat.

Daling giadto sa biktima ang mall uban sa polis ug ilang naabtan ang suspek nga dala pa ang mga butang sa biktima nga padung na ibaligya.

Nabawi sa biktima ang Macbook ug ang Ipad samtang ang ubang mga butang wala na makuha nga gituohang nahalin na.

Matod ni Police Major Don Mark Alfred Leanza, hepe sa Abellana Police Station , tungod kay naa sa posisyon sa Nigerian national ang maong mga butang, pasakaan siya og kasong pagpangawat.