Traffic enforcer binaril ng motorcycle riders

Sugatan ang isang traffic enforcer nang barilin ng dalawang nakamotorsiklong lalaki na sinita niya dahil sa hindi pagsuot ng helmet sa Navotas City noong Miyerkules ng gabi.

Bagamat may tama ng bala sa kaliwang bahagi ng katawan, nagawa ni Alvin Garcia, 43, miyembro ng Navotas City traffic and parking management office, dalhin ang sarili sa Tondo Medical Center kung saan siya ngayon nagpapagaling, ayon kay Senior Police Officer 1 Allan Joey Ogatia, investigator on case.

Base sa initial investigation, naka-duty si Garcia sa Virgo Drive, Barangay North Bay Boulevard South, nang parahin niya ang dalawang lalaking nakasakay sa Kawasaki Enduro motorcycle dahil wala silang suot na helmet dakong 7:40 a.m.

Sinabi ni Ogatia na walang license plate ang motorsiklo at wala rin maipakitang registration papers ang mga suspect para sa kanilang sasakyan.

Habang nag-iisyu ng violation ticket si Garcia, biglang bumunot ng mga baril ang dalawang suspect.

Tinangka ni Norberto Villanueva Jr., co-worker ni Garcia, na awatin ang mga suspect ngunit binaril din siya ng motorcycle driver ngunit hindi siya tinamaan; habang pinaputukan naman ng backrider si Garcia.

Humarurot palayo ang mga gunmen matapos ang pamamaril.

Bigo ang police na maka-recover ng closed-circuit television (CCTV) footage sa pinangyarihan ng krimen.

Mariing kinondena ni Navotas City Mayor John Rey Tiangco ang insidente at nangako siya na sasagutin ang medical expenses ni Garcia.