High-powered firearms, nasisid sa Lake Lanao

Mahigit 30 high-powered firearms ang narekober ng joint forces ng military at iba pang awtoridad sa operasyon na ginawa nito sa Lake Lanao, Marawi City.

Napaulat na ang pinagsanib pwersa ng 55th Infantry Battalion, Scout Ranger Class 202, 1st Ranger Battalion, Civil Military Operations (CMO) Personnel, military engineer unit, mechanized units, EOD Personnel, at waterborne units ng 12DRC and 6SFBn ay nagsagawa ng search and clearing operations sa Lake Lanao malapit sa Bandaringin Mosque sa Brgy. Marinaut, Marawi City.

Nasilayan umano ng isa sa mga sundalo ang isang armas sa ilalim ng lake, dahilan para sumisid sila sa nasabing lugar.

Sinasabing posibleng itinapon ng mga terorista ang mga armas nang maramdaman na ng mga ito ang posibleng katapusan ng kanilang laban.

Inaasahan pa ang pagrekober sa ilan pang mga armas at iba pang kagamitan ng mga terorista sa paligid ng lugar kung saan unang nakita ang mga de kalibreng armas.

Samantala tiniyak ng Armed Forces of the Philippines (AFP) Joint Task Force Ranao na magpapatuloy ang kanilang search and rescue operation sa Marawi City.