Kamo diay tag-iya?

Nalipay ko nga gipaguba na g'yud ni Mayor Michael Rama ang koral nga gitukod sa Cebu Port Authority (CPA) diha sa property duol sa karaang Compania Maritima nga giangkon nila nga ila.

Apan karon nagpabilin ang pagkahakog sa mga opisyal sa CPA kay wala gihapon nila tugoti nga makaparking ang mga sakyanan diha sa property nga giangkon nila.

Ambot unsa kahay nasulod sa utok aning mga opisyal sa CPA nga sige lang sila og pangangkon sa mga property sama sa yuta nga dili ila. Daghan kaayo nga property sa CPA nga giangkon nila nga ila apan walay mga titulo.

Basaha ra gud ninyo ang Annual Audit Report sa Commission on Audit (COA) kada tuig gihisgutan kana ang kapakyas sa CPA pagpatitulo sa mga property nga ilang giangkon. Mauwaw ta uy.

Ang tinuod walay gihuptang titulo ang CPA sa tulo ka parsela snga yuta duol sa Compania Maritima nga ilang giangkon. Ang ilang pag-angkon gibasi lang sa Memorandum of Agreement (MOA) nga ilang gipirmahan uban sa DPWH.

Kay ngano, ang DPWH ba gud ang tag-iya sa maong yuta nga gitugyan kaninyo sa CPA? Ayoha ninyo pagtoon ang balaud uy. Nagtoo ba kamo nga abi kay ang nasudnong kagamhanan pinaagi sa DPWH maoy nag-reclaim sa dagat kaniadto, ang DPWH na ang tag-iya?

Tinuod, nakigpirmahay og kasabutan ang DPWH uban sa kanhi manager sa CPA nga nag-”turn-over” sa tulo ka parsela sa yuta nga namugna human sa pag-reclaim dungan sa paghimo sa subway tunnel apan wala kini magpasabot nga inyo na ang property.

Ang pag-turn over sa DPWH sa maong property nga na-reclaim dungan sa paghimo sa tunnel kay wala sila'y tinguha nga angkonon ang luna ug nga kamo sa CPA maoy gihatagan og higayon nga mokuha'g titulo.

Apan naunsa, pinaagi lang sa MOA inyo na man nga angkonon ang property. Dili ba usa ka paghinakog ang inyong gihimo nga bisan ang pag-parking sa mga sakyanan inyong idili?

Maayo man og gipaabang ang mga tag-iya sa sakyanan nga miparking diha kay angay kamo nga masina. Giawhag nako si Mayor Michael Rama nga ipatuman gayud ang balaud mayor batok aning mga hakog nga opisyal sa CPA.

Wala man gani kamo makaatiman pagpalawom sa pantalan nga masangad na ang mga barko nga modunggo bisan og dagko kaayo og kita ang CPA. Tiaw mo, sa tuig 2012 ang CPAmiganansya og kapin sa P50 milyones apan tan-awa ang ilang serbisyo.

Ngilngiga gud magtukod mo'g infrastructure projects nga dili molukat og construction permit? Sige, i-contest ang baruganan sa Cebu City ug gamita ang inyong argumento sa pagkwestyon ninyo sa ordinansa sa Lapu-Lapu City kay tan-awon nato'g mosalir ba. Hinay g'yud kaayo ang kadagkoan sa Office of the Building Official (OBO) ingon man ang City Legal Office nga mapugngan ang mga illegal construction.

Tiaw mo nga dunay illegal construction duol sa Marco Polo Hotel nga wala gayud mapahunong hangtod karon og hapit na g'yud mahuman. Mao kini ang basihanan kon ngano nga minus ang buhis nga makolekta sa dakbayan. Kon dayonon man ni Mayor Michael Rama ang pagpanaktak sa daghang mga kaswal sa City Hall walay problema, ilabi na kon kadtong iyang taktakon mao ang mga walay klaro nga trabaho.

Dili man ikalimod nga daghang mga kawani diha sa City Hall wala na unta kinahanglana. Daghan kaayo ko og mga kawani nga makita nga nagsige lang og lingkod.

Kay naghinubra man ang mga kawani, dunay uban nga ang trabaho tigdawat ra sa mga papeles nga i-transact sa maong opisina apan kay dili man daghan ang moabut nga dukomento, magduka ug usahay maghukdong lang tawon sa lamesa.

Bisan ang higala nako nga opisyal sa City Hall miangkon nga sa iyang opisina daghang mga kawani nga wala na g'yud unta kinahanglana apan gibutang lang diha kay “political accommodation.”

Kini mao unta ang angay nga taktakon apan sigurado ko nga dili tanan niini kanila ang mataktak ni Mayor Rama kay ang nagrekomendar kanila suod man 'sab niya.

‘Dili ba usa ka paghinakog ang inyong gihimo nga bisan ang pag-parking sa mga sakyanan inyong idili?’