Raket sa clamping

Angayng pakpakan ang pagpahunong ni Cebu City Mayor Mike Rama sa gikuwestiyon nga transaksiyon sa pamunoan ni kanhi mayor Tommy Osmeña: Pagkontrata og pribadong mga kompaniya aron pagdakop sa mga sakyanan nga magpataka lang og parking. Apan ang mas dakong bahin sa multa nasipong sa pribadong mga kompaniya ug mumho ray bahin nga nadawat sa panudlanan sa City Hall.

Way makalalis sa ka-istrikto ni Osmeña batok sa mga sakyanan nga nakalapas sa mga lagda batok sa illegal parking. Apan ang mga transaksiyon nga iyang gisudlan nakapatumaw og mas dakong binuang. Nahimong dakong negosyo ang pagpatuman sa mga lagda. Kay mas niburot ang ginansiya sa pribadong kompaniya gikan sa mas daghang sakyanan nga ilang madakpan.

***

Maong nauso atol sa pamunoang Osmeña ang traffic enforcers, nga gipasaligan sa pribadong mga kompaniya nga bahinan sa dakong multa, nga nagpasalipod sa mga poste ug mga punoan sa kahoy aron di makit-an sa mga motorista, nga ang uban natental pagbiya sa ilang mga sakyanan sa di tukmang mga dapit kay dunay dinaliang mga lakaw, o napulan na og pangita og kaparkingan, o nagpahimus lang nga way nagbantay.

Gawas nga gipatalikod lang ang mga tag-iya ug gi-clamp dayon ang ilang sakyanan, may mga higayon pa gyod nga butang-butangan lang og kalapasan. Nga di kalikayang mahitabo kon, inay kahapsay, panguwarta nay tuyo sa pagpatuman sa mga lagda.

***

Gipanghimakak ni Rama nga wa na niya ipatuman ang clamping ordinance sa dakbayan. Gihimong ebidensiya ang nadakpan sa mga operatiba sa City Traffic Operations Management nga sakyanan sa City Hall nga giingong giparking og kadlawong dako duol sa imnanan sa downtown area.

Maklaro gyod hinuon kon molibot ka sa dakbayan nga nibalik pagsiaw ang overnight parking sa nagkalainlaing barangay. Ambot tungod ba sa kadaghan og higala ni Rama nga nilapas sa lagda. O nilubay nang Citom kay si Rama di sama ka- istrikto ni Osmeña. Hangtod nga gitawag ang atensiyon ni Rama sa mga lagda nga wa mapatuman.

***

Hinaot nga di tokar-tokar ang pagpatuman ni Rama sa mga lagda sa trapiko. Kay mosamot ang kahuot sa kadalanan ug mas maghuot pa ang mga sakyanan sa dakbayan kon mamadlong lang kon ganahan. Sa way paghisgot nga di makapapas sa mga pasangil nga maayo lang siya sa salingkapaw nga mga aspeto sa pagduma kon itandi sa kang Osmeña nga mas undanon ug mas lapad nga panglantaw.

Salamat nga nakakita si Rama sa wa makita ni Osmeña: Nga ang mga lagda sa trapiko giumol aron mahimong mas luwas ang kinabuhi ug kabtangan sa kadalanan; di aron lang pun-an ang panudlanan sa gobyerno, labi na kon mas dako ang bahin sa pribadong mga negosyante nga duol sa luwag sa City Hall.