Sekretong PNoy ug Purisima

Gipahibawo ni Presidente Noynoy Aquino nga gidawat niya ang resignasyon sa suspendidong hepe sa PNP nga si Director General Alan Purisima. Apan wa siya mopasabot ngano. Tungod ba sa pasangil nga si Purisima ang nagduma sa nabulilyaso nga operasyon sa Maguindanao nga nisangpot sa kamatayon sa 44 ka Special Action Force commandos? O tungod ba sa mga pasangil sa pangurakot batok niya?

Gihatagan ni Aquino og mas dakong luna sa iyang mensahe sa tibuok nasud niadtong Biyernes sa gabii ang pagpadayag og kasubo nga napugos siya pagdawat sa resignasyon ni Purisima tungod sa kataas sa ilang relasyon ug sa kasuod sa ilang panaghigalaay. Wa magtagad pagpahibawo unsay atraso ni Purisima. Gipasabot ni Purisima nga ni-resign siya aron paghatag og dugang kagawasan ni Presidente Aquino paghusay sa krisis karon sa kapolisan. Apan gipanghimakak nga siya ang tinuod nga nagduma sa operasyon. Matod ni Purisima igo lang siyang nihatag ni Aquino ug sa ground commanders sa iyang nahibawan nilang Abu Marwan ug Basit Usman.

Ang pangangkon ni Purisima nisukwahi sa nahaunang gibutyag sa girelibohan nga hepe sa SAF, si Director Getulio Napenas, nga ang ilang kamandoan naggikan ni Purisima. Nga iyang gitumbok nga maoy nagsugo niya nga pahibaw-on lang ang kasamtangang hepe sa PNP nga si Deputy Director General Leonardo Espina kon makasugod nang operasyon.

Mas gituohan bang Aquino si Napenas kay ni Purisima? Apan si Napenas maoy una niyang gikastigo, girelibohan dayon bisan wa pa kasugod ang bisan unsang imbestigasyon. Sa pipila na ka higayon gipasanginlan pa gani nga maoy responsable sa bulilyaso kay giusikan ang tulo ka kahigayonan pag-usab o pagkanselar sa operasyon.

Unsa may gikinahanglan aron magsugod na pagsulti si Aquino sa tanan niyang nahibaw-an sa operasyon? Sekreto ba gyod kaayo ang mga detalye, nga gikatahong naglambigit sa Estados Unidos, nga gusto niyang sabton na lang sa katawhan nga ang iyang pagtangtang ni Purisima sa PNP nagkahulogan nga mas dako ang iyang papel kay sa andam nilang angkunon?

Sa wa pa ang duguong trahedya sa Mamasapano sa Maguindanao, daghan na uyamot ang nahaunang mga eskandalo nga gihan-ok ni Purisima. Gilambigit siya sa kuwestiyonable nga mga transaksiyon sa pagduma sa Kampo Crame ug gipasanginlan nga nanag-iya og ilegal nga katigayonan.

Sama sa uban niyang suod nga gipasanginlan og kahiwian, si Purisima way pupanagana nga giduphan ni Aquino. Gihulagway nga matinud-anon nagsubay sa tanos nga dan ug nga igo lang gigukod sa mga naligsan sa ilang kampanya batok sa pangurakot. Hangtod nga nakakita og sukaranan ang buhatan sa Ombudsman pagsuspenso ni Purisima. Kanus-a man isugod pagpahamtang ni Aquino ang iyang ka-istrikto sa iyang mga kaatbang nga nahilambigit og mga eskandalo ngadto sa iyang gisaligan nga mga higala?