SMS sa gubat
May bag- ong panagang si Director Getulio Napeñas, ang girelibohang hepe sa Special Action Force sa Philippine National Police, sa mga pasangil nga kuwang ang ilang pangandam ug nga nalupig sila sa tibuok adlaw nga pinusilay batok sa gatosan ka armadong mga sakop sa Moro Islamic Liberation Front, Bangsamoro Islamic Freedom Fighters ug private armed groups.
Sa iyang pakig- atubang sa mga senador sa labing unang higayon, nangangkon si Napeñas nga nakapatay sila og hangtod 250 ka sakop sa MILF, BIFF ug PAGs sa 11 ka oras nga pinusilay. Sama rang namasangil si Napeñas nga gipahiyos sa MILF ang ilang pangangkon nga 14 ra nila ka sakop ang nangamatay.
Pagmatuod nga di kinuha ang mga numero gikan sa tumoy lang sa iyang buhok, nihatag si Napeñas og sukaranan sa iyang banabana. Walo ka snipers sa SAF ang naapil sa engkuwentro sa Mamasapano, Maguindanao: Duha sa 84th Company ug unom sa 55th Company. Matod ni Napeñas matag sniper sayon kaayong nakapatay og 20 ka rebelde tungod sa lahutay sa panagsangka.
Sa ato pa, sa snipers pa lang daan, 160 na ka rebelde ang napatay. Ang ubang mga sakop sa duha ka kompaniya gibanabanang nakapatay sab og dulan sa 100. Gisubli pagtataw ni Napeñas nga wa magpatara ang nangamatay nga 44 ka SAF commandos.
Makatubag ba sa mga pasangil sa kakuwang og pangandam ug kabusluton sa plano ang bag- ong kasayuran nga gibutyag ni Napeñas? Makumbinser ba niya si Presidente Noynoy Aquino nga maoy nagsige og tulisok niya sa kapakyas pagpanalipod sa iyang mga sakop sa kalikayan unta nga engkuwentro?
May dugang tulo ka alas si Napeñas: Napamatudan ang kamalukpanon sa ilang plano batok nilang Zulkifli bin Hir, alyas Marwan, ug Abdul Basit Usman; wa sila magmika hinunoa nilusad og subsob nga operasyon batok sa duha ka gipasanginlang terorista; ug kadaghan na sila nakiglambigit sa militar apan karon pa nilampos paghipos ni Marwan nga gitago nang ilang operasyon.
Ang unang hugna sa imbestigasyon sa Senado nakapatumaw sa makapasubo nga kamatuoran sa sistema sa komunikasyon sa militar ug kapolisan: Ang ilang binayloay sa dinalian ug mahinungdanong kasayuran samtang nagdilaab nang gubat sa Mamasapano gipaagi lang sa short messaging system. Wa bay nakasulti nila nga mas dali ug mas kasaligan ang voice calls?
Giangkon sa Armed Forces of the Philippines nga usa sa ilang mga heneral nalangay pagbasa sa usa sa text messages nga pakitabang gikan sa SAF. Mas paspas ba kaha untang pagtabang sa kasundalohan ug kamenosan ba kahang gidaghanon sa nangamatay kon inay nagsige og text nagtinawganay ang SAF ug AFP? O ang sobrang pagsalig sa SMS timaan lang nga gipalabi nilang panagsungi kay sa panaghiusa?