Mga trailer lisud dakpon

Giangkon ni Land Transportation Office Acting Chief Alita Pulga nga problema nila ang pagpanakop sa mga trailer nga gipadagan-dagan nga walay rehistro.

Ang rason kay kuwang kuno sila og mga deputized agents nga manakop ug wala sila'y towing vehicle nga magamit sa pagguroy niining maong bug-at kaayong sakyanan.

Wala kaayo niini mahibawo ang kadaghanan nga kining mga trailer nga guroyon sa mga prime mover, nagkinahanglan usab nga irehistro sa LTO, ug kon kini gamiton nga walay rehistro, madakop ang mga drayber.

Buyno, ibutang nato nga walay towing vehicles ang LTO nga makaguroy niining mga dili rehistrado nga trailers nga gipanagiya sa mga trucking services, dakpon lang nila ang mga drayber.

Apan kinahanglan gyud unta nga pangitaan og paagi sa LTO nga mapitol kining mga tagdumala og trucking services nga nag-operate og dili rehistradong trailers.

Kinahanglan nga irehistro ang trailers aron makabayad og road users tax ang tag-iya kay usa kini sila sa makaguba sa atong mga karsada tungod sa kabug-at sa ilang kargamento?

Para kanako, bisan og upat lang ang mga law enforcers sa LTO-7 regional office, mahadlok na ang mga abusadong drayber kon motinuod sila sa paghimo'g operation.

Kuwang ra gyud og paninguha ang mga LTO road enforcers, pareho ra sila sa mga traffic enforcers sa Cebu City Transportation Office nga magtan-aw lang sa mga dakponon.

Sige ko og reklamo nga ang aseras diha sa Serging Osmeña Avenue duol sa V. Sotto Street gibutangan og naglumbay nga mga trisikad nga para baligyaanan og siomai, wala gyud nila maasikaso.

Ang rason sa pangulo sa mga traffic enforcers kay kun anaa sa karsada ang maong mga trisikad ilang sakmiton. Sa ato pa, kay anaa man kini sa aseras, dili na kini ilang trabaho.

Mura'g masabot nga nanghunaw ang CCTO nga dili ilang trabaho ang pagsakmit sa maong mga trisikad abi kay anaa man kini sa aseras. Ang akong nahibaw-an kaniadto nga ang CITOM, karon gitawag na og CCTO, adunay team nga mo-clear sa mga makababag sa pag-agi sa mga tawo diha sa aseras.

Kon ang aseras gud babagan, sama sa pagbutang og daghang trisikad nga kinadenahan pa, ang mga tawo adto na moagi sa karsada ug makabalda na kini sa pag-agi sa mga sakyanan.

Unsaon man sab gud nga ang mga sakop sa PROBE team sa City Hall nga gidumala niAbel Diloy wala man sa'y gihimo niining maong problema nga anaa man unta siya magpuyo dihang lugara.

Ang usa sa mga letra sa PROBE nagkahulogan og "prevention" apan ambot nakasabot ba kaha sila niini. Mura ko og plaka nga buak nga nagbalik-balik niining maong problema kay gusto unta nako nga hapsay ang atong syudad.

*** Giundang na ang illegal swertres duol sa Sitio Langub sa Barangay Kalunasan. Nalipay ang mga lumolupyo sa maong dapit nga giundang na sa tagdumala ang ilegal nga sugalan.

Apan sa ubang dapit, sama niining anaa sa sudlonon nga bahin dapit sa tulay sa dalan P. Burgos ug Colon, ingon man sa duol sa barangay hall sa Pahina-San Nicolas nagpadayon gihapon.

Unya, ang operation sa mga video karera ug moli-moli misiaw na usab pag-ayo sa lainlaing kabarangayan kay gipasagdan ra man sa mga polis ug wala man magtagad niini si Cebu City Police Director Joel Doria.

Ang report nga niabot nako puwerteng daghana nga video karera ug moli-moli diha sa Barangay Ermita apan ang mga sakop sa Carbon Police Station nagpakabuta-bungol lang.

Ang higala ko nga polis nitug-an nga husto ang akong report nga kun may masakmit nga karera, mabalik ra gihapon sa mga operators kay pailisan ra man og guba nga kahon bugti sa bayad.

Husto lagi gyud ang among nahuna-hunaan ni Konsehal Dave Tumulak nga ang mga masakmit nga video karera kinahanglang ideritso na paghatod sa City Hall ug anha ibutang sa Plaza Sugbo ug pangkadenahan.